Қарасай ауданы Шамалған ауылындағы «Атамекен» тарихи-мәдени орталығында «Анам сыйға тартқан орамал» атты мәдени шара өтті. Халықаралық орамал күніне орай ұйымдастырылған мерекеге ауданның ақ жаулықты аналары мен қыз-келіншектері қатысты. Ұлттық тәрбие мен салт-дәстүрдің бастауы болған аналар жастарға ғасырлар қойнауынан келе жатқан құндылықтарды паш етті.
Шарада ауданның ардагер аналары сөз алып, кимешек пен орамалдың мәні мен мағынасы жайлы кеңінен әңгіме қозғап, тарихи тың деректермен бөлісті. Тазалық пен иманның, сән-салтанаттың символы болған кимешек пен жаулық, орамалдардың сан түрі қойылған көрме көпшіліктің көңілінен шықты. Мұнда тек ескі кимешектер ғана емес, заманауи жаңа баскиімдердің де үлгілері көптеп саналады. «Осыдан бес жыл бұрын «Анаға құрмет» музейінде осы халықаралық орамалдар мерекесін алғаш рет өткізіп, аналардың қолдауына ие болған едім. Осы жылдар ішінде өткен кимешектер мен орамалдардың халықаралық, республикалық фестивальдары мен басқа да іс-шаралар өз нәтижесін берді. Жаһандану әсерінен өзге елдің салт-дәстүріне, мәдениетіне көзсіз еліктеп, өзіміздің асыл дүниелерімізден көз жазып, хиджаб, паранжа, никаб киетін жастар мен жасамыстарымыз көбейгені өкінішті. Осы орайда өзіміздің ұлттық киімдерімізді насихаттап, аналарымыз таққан орамал, кимешектердің абырой-беделін бірге көтерейік», – деген ұлттық киім жанашыры, «Көшпенділер кимешегі» жобасының авторы Аршагүл Тойбаева да көрмеге кимешектерін ала келген.
Ал қазақтың сәндік қолданбалы өнерінен туған түскиіз бен сырмақ, көрпе-жастықтардың әдемі ою-өрнегі мен қанық бояуы көздің жауын алады. Қолөнермен айналысатын мектеп оқушылары кеш қонақтарын өз жұмыстарымен таныстырып, сырмақ басудың қыр-сырын көрсетті. Сонымен қатар шара барысында қарқара ораудан, орамал салудан шеберлік сыныбы өтті.
Шара соңында орталықтың директоры Аяужан Заманбекқызы орамал тартудан ұйымдастырылған челленджді Жамбыл ауданының ақ жаулықты аналарына жолдады.
Құралай МҰратқызы
Қарасай ауданы
