Қонаев қаласының әкімі Асхат Бердіханов белгіленбеген орындарда, яғни 3-шағынауданда сауда жасайтын азаматтарды қабылдады.
Бұл жолы саудагерлер 8 наурыз – Халықаралық әйелдер күніне орай, Абай көшесінің бойында гүл сатуға рұқсат сұрады.
Шаһар басшысы «Айша сити» базарында кез келген тауарды сатуға болатынын атап өтіп, заң аясында жұмыс істеуге шақырды.
«Өздеріңізге мәлім, «Айша сити» базары стационарлық емес бөлшек сауда орны ретінде заңмен (Алматы облысы Қапшағай қаласы әкімдігінің 2022 жылғы 8 ақпандағы №59 қаулысы) белгіленген. Қазір онда бірнеше жаңа сауда орындары құрылды. Сіздер базар басшылығымен келісімшартқа отырып, қызмет етулеріңіз керек. Гүлді де, басқа тауарларды да осы базарда сатсаңыздар болады», – деді әкім.
Ал Абай көшесінің бойына шағын сәулеттік нысандар қойылады.
«Қала күннен күнге өсіп жатыр. Сондықтан ретсіз саудаға жол жоқ. Қазір шағын сәулеттік нысандарды орнатамыз, кейіннен бұл көшені абаттандыру жоспарланған. Баршаңызды ҚР белгіленген заң бойынша жұмыс істеуге шақырамыз», – деді Асхат Бердіханов.
