Іле ауданының әкімі Қайыржан Жақсымбетов тұрғындармен қоғамдық қабылдау өткізді. Жиынға аудан әкімінің орынбасарлары, бөлім басшылары және ауылдық округ әкімдерінің өкілдері қатысты.
Қабылдауға 40 азамат жазылып, өз өтініштерін жеткізді. Өтеген батыр, Байсерке, Ащыбұлақ, Қараой, Ақсай және А.Тоқпанов ауылдарынан келген тұрғындар негізінен:
Жұмысқа орналасу, тұрғын үй мәселесі, материалдық көмек, инфрақұрылым және әлеуметтік салаға қатысты сұрақтар көтерді.
Аудан әкімі әрбір азаматтың өтінішін мұқият тыңдап, заң аясында түсініктеме берді. Тиісті бөлім басшылары да тұрғындарға нақты жауаптар ұсынды. Кейбір мәселелер сол жерде шешімін тапса, кейбір өтініштер бойынша терең зерттеу жүргізілетін болды.
«Халықтың көкейінде жүрген сұрақтар мен мәселелер назардан тыс қалмауы керек. Әрбір өтініштің заң аясында қаралып, шешім табуына мән береміз», – деді аудан әкімі.
Айта кету керек, «AMANAT» партиясы қарапайым азаматтардың мүддесін қорғап, олардың талап-тілектерін орындау жолында жүйелі жұмыстар атқаруда.
