Қазіргі таңда спорт – қоғамымыздағы маңызды құндылықтардың бірі. Әсіресе, жастар арасында салауатты өмір салтын насихаттау, спорттық дағдыларды дамыту мақсатында ашылған үйірмелердің үлесі зор. Осы тұрғыда Алматы қаласының «Көкжиек» ықшамауданында ашылған күрес үйірмесі ерекше назар аудартады. Бұл үйірме спортпен шұғылдануға ынталы жастар үшін керемет мүмкіндік ұсынуда.
Аталған үйірменің жетекшісі Бекжан Нұрымның қажырлы еңбегі мен жігері арқасында бүгінгі таңда жүздеген жас спортшы өз өнерлерін шыңдап, болашақ чемпиондық жолдағы алғашқы қадамдарын жасауда. Бекжан Нұрым – 2015-2019 жылдар аралығында Қазақ спорт және туризм академиясында білім алып, өзін жан-жақты дамытқан үздік студенттердің бірі. 2019 жылы бакалавр бағдарламасын үздік аяқтап, магистратураға грант жеңіп алды. Оқу барысында жоғары нәтижелер көрсетіп, қатарынан 6 жыл стипендия иегері атанды. 2021 жылы магистратураны сәтті аяқтап, диссертациясын қорғаған соң, сол академияда оқытушылық қызметін бастады. Ол ұлттық спорт түрлері мен күрес дисциплинасы бойынша студенттерге теориялық және практикалық сабақтар өткізіп, кураторлық қызмет атқарды. 2021-2022 оқу жылында Бекжан Нұрым М.Мақатаев атындағы №140 гимназияда дене шынықтыру пәнінен дәріс берсе, 2023-2024 жылдары күрес үйірмесінде жаттықтырушы болды. Ол қазақ күресінен республикалық турнир ұйымдастырып, оның жоғары деңгейде өтуіне зор үлесін қосты.
Бүгінді таңда аталмыш үйірменің спортшылары өздерінің талантымен, спортқа деген махаббатымен жарыстарда топ жарып жүр. Мұндағы күрес үйірмесі – тек спортпен шұғылдану алаңы ғана емес, болашақ чемпиондардың қалыптасатын жері. Бекжан Берікұлының жетекшілігімен бұл үйірмеде жүздеген жас өздерінің арман-мақсаттарына жету үшін еңбек етуде. Жастардың денсаулығын жақсарту, оларға тәртіп пен жауапкершілікті үйрету және болашақта еліміздің спорт саласына өз үлестерін қосу – үйірменің басты жетістіктері. «Көкжиек» ықшамауданындағы күрес үйірмесінің болашағы жарқын әрі еліміздің спорттық жетістіктеріне үлес қосатын маңызды орынға айналатыны сөзсіз.
Бекзат Ғабитқызы,
Қазақ ұлттық қыздар педагогикалық университетінің докторанты
