Облыстық білім басқармасының ұйытқы болуымен «Функционалдық сауаттылықты дамытудағы табысты тәжірибелер және жаңа бағыттар» тақырыбында халықаралық конференция өтті. Халықаралық зерттеулердің нәтижелерін зерделеп, мектеп оқушыларының функционалдық сауаттылығын арттыруға арналған заманауи әдіс-тәсілдерді талқылау және білім беру үдерісіндегі озық тәжірибелерді бөлісу, педагогтардың кәсіби құзыреттілігін жетілдіру мақсатындағы конференцияға Түркия, Қырғыз Республикасынан сала мамандары арнайы келді.
Еңбекшіқазақ ауданындағы Ә.Бөкейханов атындағы қазақ орта мектебінде өткен конференцияда «Экоауыл», «Микроөскін», «Гидропоника», «Дұрыс тамақтану», «Ақылды мектеп», робототехникаға қатысты STEM жобалар көрмесі ұйымдастырылды. Мектеп қабырғасынан ғылымға қадам басқан оқушылар зерттеу жұмыстарын жан-жақты таныстырып, инновациялық жобалардың адам өміріне, қоғамға тигізер пайдасы жайлы кеңінен ақпарат берді.
Конференцияның ресми бөлімін облыстық білім басқармасының басшысы, пленарлық сессияның модераторы Салтанат Беспаева ашып, жиынға арнайы келген қонақтармен таныстырды. Түркия Республикасы Гази университетінің профессорлары Исмаил Каракая, Назира Тұрсынбаева, Қырғыз Республикасы халықаралық университетінің оқытушысы, доцент Чынара Аблабекова, SDU университетінің докторанты, Qalan kz «Product Math» бөлімінің сарапшысы Мейіржан Нұрланұлы, Қырғыз Республикасы халықаралық университеті білім сапасын бақылау және бағалау бөлімінің басшысы Айнура Раимова, Абай атындағы Қазақ ұлттық педагогикалық университеті қазақ тілі теориясы және оқыту әдістемесі кафедрасының меңгерушісі, профессор Нағима Ілиясова және еліміздің барлық өңірінен жалпы 400-ге жуық педагог халықаралық конференцияда бас қосып, өзара тәжірибе алмасты. Сонымен қатар конференция жұмысына тікелей трансляция арқылы 20 мыңдай педагог қатысып отырды.
«Алматы облысы – халық тығыз орналасқан өңірлердің бірі. Біздегі оқушы саны – 452 мың. Өңірде балабақша, мектеп пен колледждерді қосқанда білім саласында 1600 нысан бар. Оның 437-сі – мемлекеттік мектеп», – деп, алыс-жақыннан келген қонақтарды өңірдегі білім саласындағы жаңалықтармен таныстырып өткен басқарма басшысы дарынды балаларды қолдау, мұғалімдердің біліктілігін арттыру мақсатында қайта даярлау курстарын ұйымдастыру, оқу кабинеттерін заманға сай жабдықтау сынды жұмыстар мен «Табысты 50 мектеп» жобасы жайлы баяндады. Былтыр Алматы облысы ауыл мектептерінің оқушыларына арналған жалпы білім беретін пәндер бойынша республикалық олимпиадада командалық есепте 1-орын иеленгенін де мақтанышпен айтты.
«Қазіргі заман талабы – оқушылардың теориялық білімін өмірмен байланыстырып, оларды сыни ойлай алатын, тиімді шешім қабылдай білетін функционалдық дағдылары дамыған тұлға ретінде қалыптастыру. Осы орайда халықаралық тәжірибелерді зерттеп, үздік әдістемелерді жұмысымызға енгізу – басты міндеттеріміздің бірі, – деген Салтанат Дауысбекқызы мұндай дағды оқушылардың болашақта бәсекеге қабілетті, белсенді, әрі жауапты азамат болып қалыптасуына ықпал ететініне тоқталды.
Шара барысында шетелден келген қонақтар «PISA – 2025 зерттеуіндегі негізгі өзгерістер», «PISA нәтижелері және болашаққа бағытталған білім беру стратегиялары» сынды тақырыптарда баяндама жасап, өз елдеріндегі тәжірибелерімен бөлісті.
Конференция жұмысы «Оқу сауаттылығын дамытудың әдістемелік негізі», «Математикалық сауаттылықты дамыту жолдары», «Жаратылыстану ғылымының өзекті мәселелері», «Цифрлық трансформация: білім беру жүйесіндегі ақпараттық және техникалық сауаттылықтың жаңа мүмкіндіктері» тақырыбындағы секция алаңында жалғасты.
Кез келген мемлекеттің табысты дамуы білім беру жүйесіне тікелей байланысты. Осы орайда халықаралық тәжірибені оқу процесіне енгізе отырып, білім сапасын арттыру, әрі мектеп партасында отырған балалардың ертеңгі күні халықаралық сұранысқа сай маман болып өсуіне қазірден жағдай жасау сынды маңызды мәселелерді шешуде конференцияның маңызы зор болды.
Құралай Мұратқызы
Еңбекшіқазақ ауданы