Алматы облысы туризм саласында 2024 жылдың қорытындысы бойынша оң өсу қарқыны байқалуда. Былтыр аймаққа 1,9 миллион турист келген, бұл өткен жылмен салыстырғанда 27%-ға артық. Бұл көрсеткіштер облыстың саяхатшылар үшін танымал бағытқа айналып келе жатқанын айқын көрсетеді.
Ерекше назар аударатын жайт — шетелден келген туристер санының артуы. Шетелдік қонақтарды есепке алуға арналған «eQonaq» жүйесінің мәліметіне сәйкес, 2024 жылы облысқа 134 775 шетелдік турист келген, бұл 2023 жылғы көрсеткіштен 60%-ға жоғары. Мұндай өсім облыстың табиғи байлығы мен мәдени мұрасына деген қызығушылықтың артуымен түсіндіріледі.
Алматы облысының ұлттық парктері саяхатшыларды өзіне баурайтын және туристердің негізгі ағыны шоғырланған нысандар болып саналады. Облыс аумағындағы 3 ұлттық парк республикалық деңгейдегі туристік аумақтардың тізімінде. «Көлсай көлдері», «Іле-Алатау», «Шарын шатқалы» ұлттық парктеріне, жалпы алғанда 2024 жылы келген туристер саны 1 343 308 адамды құрады. Бұл табиғи қазыналар тек қазақстандық туристерді ғана емес, әлемнің түкпір-түкпірінен келетін саяхатшыларды да тартуда.
Өткен жылғы жетістіктер Алматы облысының Қазақстанның басты туристік орталықтарының бірі ретінде мәртебесін нығайта түсуде. Табиғаттың қайталанбас көріністері, жоғары деңгейлі қызмет көрсету және елді дұрыс таныту, саяхатшылардың жүрегін жаулап, облыс аумағын ерекше сапардың мекені ретінде көрсетуде.
Белсенді және мәдени демалысқа деген қызығушылықтың артуын ескере отырып, болашақта заманауи туристік нысандардың, инфрақұрылымдық шешімдердің және жаңа қызмет түрлерінің көбейетінін күтуге болады. Бұл өз кезегінде өңірді әлемдік туристер үшін одан да тартымды етеді.
Қуанышбек Мирамбекұлы,
Алматы облысы туризм басқармасының басшысы
