Қарасай ауданының ірі инвесторларының бірі «Хамле Компани ЛТД» кондитерлік фабрикасы ұзақ жылдан бері ел экономикасын дамытуға елеулі үлес қосып келеді. Әлемге танымал «Pladis» компаниялар тобына кіретін заңды тұлғалардың бірігуіне байланысты мұнда ребрендинг жүргізілді. Соның нәтижесінде «Хамле Компани ЛТД» ЖШС-ның заңды атауы «Pladis Kazakhstan» болып өзгертілді.
Компанияның ресми өкілдері атап өткендей, бұл қадам кәсіпорын тарихында маңызды кезең болып саналады және оған жаңа мүмкіндіктер ашады. Алайда оның негізгі қызметі Қазақстан мен шетелдік тұтынушыларға арналған ұзақ сақталатын тоқаштар, печенье, ұннан жасалған кондитерлік өнім өндіру болып қала бермек.
Бір айта кетерлігі, компания Қаскелеңде орналасқан және ауданның жүйе құраушы кәсіпорындарының қатарына жатады. Оның ресми тіркелген күні – 1998 жылдың ақпаны. Ұжымды Ахмет Юртгүдер басқарады.
Бұл – Қарасай жерінде түрік инвесторларының қаражаты есебінен салынған алғашқы өндірістердің бірі. Оның жобалық құны – 8 миллиард теңге.
Кәсіпорын ассортиментінде 103 атау бар. Олар – печенье, құрғақ нан, вафель, торт, рулет, шоколад өнімдері мен сағыздар, соның ішінде «Хамле», Ulker, McVitie`s, Digestives, Godiva, Alpella, Flame брендтері де кездеседі. Сонымен қатар, экспорттың үлесі жалпы сату көлемінің 30 пайызын құрайды.
Компанияның өнімдері халал және денсаулық сертификаттарына ие болғаны да маңызды. Олар «Тамақ өнімдерінің қауіпсіздігі туралы», «Тамақ өнімдерінің таңбалануына қатысты», «Тамақ қоспалары, хош иістендіргіштер және технологиялық көмекші құралдардың қауіпсіздігі туралы» талаптарға сәйкес келеді. Сонымен қатар, печеньелер, вафельдер және басқа тәттілер тек Қазақстан бойынша ғана емес, Қырғызстан, Өзбекстан, Әзербайжан, Грузия, Беларусь, Тәжікстан, Моңғолия және Қытай елдеріне де жіберіледі.
Әлемге танымал «Pladis» компаниясы 300 жылдан астам тарихы бар ас әзірлеу мен кондитерлер ісін жемісті жалғастыруда. Бүгінгі таңда оның әлем бойынша 27 филиалында 16 мың адам жұмыс істейді. Солардың қатарында 1000-нан астамы Қаскелеңдегі «Pladis Kazakhstan» компаниясында еңбек етуде.
Қуат ҚАЙРАНБАЕВ
Қарасай ауданы
