Газет журналистерінің оқырмандармен кездесіп, ой өрбітуі – қашаннан қалыптасқан игі дәстүр. Міне, осы мақсатта облыстық «Алатау арайы» және «Огни Алатау» газеттерінің бас редакторлары Кеген ауданына арнайы барып, аурухана ұжымымен кездесті.
Қос басылымның басшылары алдымен аудан әкімі Нұрбақыт Теңізбаевтың қабылдауында болып, өзара әріптестік жайын талқылады. Баспасөзге жазылу, таралымның аздығы, пошта қызметінің газет-журнал таратудағы сылбыр қимылы әңгіме арқауына айналды.
Аудандық аурухана ғимаратында өткен жиынды аурухана директорының орынбасары Мұрат Серікұлы ашып, шараның мақсаты мен маңызына қысқаша тоқталды. Халықтың рухани сырласы – облыстық газеттерге деген медицина мамандарының көзқарасын тілге тиек етті. Кездесу барысында жиын қатысушылары басылымның жүріп өткен жолы, қоғамдық пікірді қалыптастырудағы алатын орны, ғаламторға тәуелділік белең алып тұрған бүгінгі таңдағы газет-журнал, кітап сияқты құнды дүниелердің маңыздылығы, оқырмандармен арадағы байланыс төңірегінде ашық пікір алмасты.
Алғашқы сөз тізгінін ұстаған «Огни Алатау» газетінің бас редакторы Забира Дайранқызы: «Тәрбиесіз берілген білім – адамзаттың қас жауы» деп Әбу Насыр әл-Фараби бабамыз айтқандай, өкінішке қарай, қазір тәрбие артта қалып, технология озып кетті. Қос басылым осы олқылықтың орнын толтыруға атсалысуда. Салт-дәстүрді насихаттап, мемлекеттік тілдің мәртебесін асқақтатуда жемісті еңбек етіп келеді. Екі газеттің илеп отырған пұшпағы бір. Сондықтан рухани дүниелерді басылым бетінен оқып, газетке үзбей жазылып отырсақ қандай ғанибет! Сол арқылы балаларымыздың оқу мәдениеті қалыптасады», – дей келе, газеттің бүгінгі таралымы жайында кеңінен хабардар етті.
«Алатау арайы» газетінің бас редакторы Қуаныш Тұнғатар әріптесінің сөзін ары қарай жалғады.
– Мемлекет басшысы
Қасым-Жомарт Тоқаевтың «Оқитын ұлт» бастамасына байланысты газет-журнал, кітап оқу үрдісін жандандыруымыз қажет. Осыған орай, облыстық екі газет үн қосып, халықты оқитын ұлтқа айналдыру үшін өңірлерде кездесу өткізіп келеміз. Сарапталған, талданған, шынайы ақпараттарды, мақалаларды ұсынатын – дәстүрлі басылымдар, ресми тіркелген БАҚ. Сайттардан, әлеуметтік желідегі жазбалардан газетті айрықшалап тұратын негізгі басымдық осы. Сондықтан газеттің мәні ешқашан жойылмайды, – деді ол.
– Айтқан сөздеріңіздің жаны бар, қазіргі кезде бәрі ұялы телефонмен жұмыс істеп жатыр, бір шетінен заманның талабы да солай болып тұр, екіншіден, бұл байланыс құралының денсаулыққа зияны да аз емес. Аутизм ауруының өршуі осы ұялы телефонның әсерінен болып жатыр ма деп ойлаймыз. Бұрынғы кезде ақпаратты газеттен ғана оқып отыратынбыз, қазір жаппай интернетті пайдаланамыз. Әрине, қағаз басылымдардың жөні бөлек. Оның мәні мен маңызын өздеріңіз тәптіштеп айттыңыздар. Біз де сол сөздерге қосыламыз. Сондықтан қос басылымды әрқашан қолдаймыз, оқырманы болуға атсалысамыз. Жұмыстарыңызға табыс тілеймін! – деген аудандық аурухана директорының орынбасары Мұрат Серікұлы жиынды қорытындылап, газет басшыларына жылы лебізін білдірді.
Ғаламтор үстемдік құрған кезеңде де көзіқарақты оқырман газет-журналдан қол үзбек емес. Міржақып Дулатов «Қай елдің баспасөзі мықты болса, сол елдің болашағы зор» деген. Ал баспасөздің өміршең болуы оқырманның көптігіне тікелей байланысты. Басылымға жазылушылардың саны артып, оқырманның әдеби талғамы биік болған сайын баспасөздің рөлі беки түсіп, тынысы кеңейе бермек. Жас ұрпақтың зерделі, ойлы болып өсуі үшін де газет-журнал, кітаптан қол үзбеу керек. Бұл ретте облыстық басылымдардың орны бөлек. Сондықтан да баспасөзге жазылуды ұмытпайық!
Дәурен ӘБУТӘЛІПОВ
Кеген ауданы
