Талғар ауданында мүмкіндігі шектеулі балаларға арналған иппотерапия оңалту орталығы ашылды. «Ақбұлақ» спорттық-сауықтыру кешенінде өткен салтанатты шараға аудандық және облыстық халықты әлеуметтік қорғау саласының қызметкерлері, мүгедек балалардың ата-аналары, ат спорты нұсқаушылары, әкімдік өкілдері, денсаулық сақтау жүйесінің қызметкерлері қатысты.
Облыстық жұмыспен қамтуды үйлестіру және әлеуметтік бағдарламалар басқармасының басшысы Айгүл Ахметова құттықтау сөз сөйлеп, соңғы кездері жұмыспен қамту орталығы мүмкіндігі шектеулі балаларды қолдау, оларды оңалту, бейімдеу және қоғамға әлеуметтендіру бойынша көптеген мемлекеттік бағдарламаны іске асырып жатқанын атап өтті.
– Иппотерапия сал ауруын қалпына келтірудің тиімділігі бойынша әлемдік оңалту тәжірибесінде кеңінен қолданылады. Осы мақсатта облыс тарапынан 9 млн теңге көлемінде қаражат бөлінді, нұсқаушы бекітіліп, олар тек жылқылармен ғана емес, мүгедек балалармен де жұмыс істеуге арнайы курста оқытылды. Мұндай орталықтар балаларды қоғамға бейімдеу үшін қолайлы жағдай жасауға, олардың қоршаған әлемді сезінулеріне мүмкіндік береді, – деп атап өтті Айгүл Матанқызы. Оның айтуынша, таза ауада поло-клубтың ашылуы атқарушы билік өкілдерінің және жылқыларды тегін берген бірқатар фермердің қолдауы арқасында жүзеге асқан. Мұнда ата-аналар балалардың денсаулығын сақтау бойынша қызметтерді ақысыз ала алады.
Ата-аналар балаларына қамқорлық танытып отырған әлеуметтік қызметкерлер мен жомарт жанды шаруаларға ризашылықтарын білдірді. Шараның соңы ақ жаулықты аналар шашқан шашу мен мерекеге арналған концертке ұласты.
Оқырманға түсінікті болуы үшін айта кетейік, иппотерапия дегеніміз – анималотерапияның бір түрі. Мұнда адамдарды атқа мінгізу арқылы емдейді. Медицинаның атасы саналатын Гиппократтың өзі меланхолияны жылқыға мініп серуендеу арқылы емдеуге шақырған екен. Бұл емдеу тәсілі әлемнің көптеген елінде қолданылады. Осындайда мыңдаған жыл бойы атқа жайдақ мініп шапқан ата-бабаларымыздың мұны қалай білгеніне таңданасың әрі мақтанасың!
Құтмағамбет ҚОНЫСБАЙ
Талғар ауданы
