Жамбыл ауданы Мыңбаев ауылында «Мектеп жасына дейінгі балалардың танымдық іс-әрекетін белсендіруде дидактикалық материалды қолданудың жолдары» тақырыбында аудандық семинар өтті. Шараға мектеп жанындағы шағын орталықтар мен балабақшалардың тәрбиешілері қатысты.
Мыңбаев орта мектебінің базасында өткен семинарда аудандық білім бөлімінің әдіскері Әтіркүл Қожахметова баланың танымдық әрекетін қалыптастыруда жеңіл ойын түрін пайдалану тәсілдерін түсіндірді. Шеберлік сыныбында мектепалды даярлық топтарының ұстаздары өз жұмыстарын ортаға салды. Атап айтқанда, Қайназар ауылындағы №2 орта мектебінен Айдана Құрманәліқызы үстел үстіндегі ойындар арқылы баланың танымдық қабілетін арттырудың жолдары туралы тәжірибесімен бөліссе, Ұзынағаш орта мектебінің мұғалімі Айнаш Аққұлықызы дидактикалық ойындардың тиімділігін көрсетті. С.Бердіқұлов атындағы білім шаңырағының педагогы Жазира Өмірқанқызы «ТАНГРАМ» әдісін ұсынды. Сонымен қатар Мыңбаев орта мектебінің тәрбиешілері Назгүл Қанатбекқызы, Назым Орынбасарқызы, Жадыра Елемесқызы, Салтанат Рахымбайқызы шеберліктерін паш етті.
Практикалық алаңда Бұрған ауылындағы С.Бигелдиев атындағы мектеп-бөбекжай кешенінен Толқын Қуандыққызы «Жасанды интеллект көмегімен дидактикалық ойындарды құрастыру», Беріктас орта мектебінен Әсел Серікжанқызы «Ұйымдастырылған іс-әрекетте дидактикалық ойындарды пайдаланудың жолдары», Мәтібұлақ орта мектебінен Рахат Ергешбекқызы «Баланың танымдық дағдысын қалыптастыруда заттық дидактикалық ойындарды қолдану» тақырыптарындағы жұмыстарын көпшілік назарына ұсынды.
Тәжірибе алмасу кезінде тәрбиешілер ұтымды ұсыныстарын білдіре отырып, дидактикалық ойындарды іс жүзінде қолдануды меңгерді.
Серік САТЫБАЛДИЕВ,
Жамбыл ауданы
