Мемлекет басшысы Қасым-Жомарт Тоқаев биылғы жылды Жұмысшы мамандықтары жылы деп белгіледі. Ондағы мақсаты – еңбектің көрігін қыздырып жүрген жандарды насихаттау, жұмысшы мамандықтарының беделін арттыру.
Аграрлы ауданымыздың ауылшаруашылық саласының тасын өрге домалатып, дала төсін дүбірге бөлеп жүрген де осы жұмысшы мамандар. Соның ішінде механизаторлардың еңбегі орасан зор. Өйткені, нағыз еңбек адамының үлгісін көрсетіп жүрген тракторшылардың қызметі қай кезде болсын маңызды саналады. Сондай механизатор мамандардың бірі – жастайынан тракторды тізгіндеп, еңбекпен шыңдалған Бақдәулет Әлиахметов. Ол өзінің саналы ғұмырының 44 жылын механизатор мамандығына арнап, жаздың аптап ыстығы мен қыстың қақаған аязында қайнаған тіршіліктің бел ортасында жүріп, нағыз еңбектің көрігін қыздырып келеді.
Әрине, әр саланың өзіндік қиындығы мен қызығы болатыны заңдылық. Бақдәулет ағамыз сол қиындықтарды еңсеріп, айналысып жүрген кәсібінің хас шебері атанған жан. Ол өз мамандығына деген сүйіспеншілік пен жауапкершіліктен басталатыны анық. Біз де осы ретте өмірде түйген өнегесі мен тәжірибесі мол жаннан үлгі аламыз. Үлкендердің тағылымды жолын жалғау кейінгі буынның парызы деп білеміз.
Бақтығали ДӘУІТБАЕВ
Балқаш ауданы
