Алғыс айту күні қарсаңында Астана қаласында «AMANAT» партиясының республикалық үздік бастауыш партия мен қоғамдық қабылдау бөлмесі байқауы қорытындыланды. Елдің барлық аймағындағы 3700 бастауыш партия ұйымы мен 225 қоғамдық қабылдау бөлмесінің өкілдері іс-шараға онлайн қатысты.
Қазылар алқасының шешімімен Алматы облысы мен Астана, Шымкент қалаларының бастауыш партия ұйымдары үздік деп танылды. Олардың қатарында «Үздік бастауыш партия ұйымы – 2025» республикалық байқауында 1-орын иегері атанған Іле ауданының «ФИРМА БЕНТ» бастауыш партия ұйымын мақтанышпен айтамыз.
Бастауыш партия төрағасы, белгілі кәсіпкер Дінмұхамед Кузиев: «Бұл жетістік – ұжымымыздың бірлескен еңбегінің, қоғамға жасаған адал қызметінің және ортақ мақсат жолындағы табандылығының жемісі. Бастауыш партия ұйымының жұмысы – тек ұйымдастырушылық қана емес, оған жауапкершілік, қоғаммен тығыз байланыс, халықтың сенімін ақтау сынды міндеттер кіреді. Бұл марапат – мен үшін үлкен құрмет! Әріптестеріме, серіктестеріме және қолдау білдірген баршаңызға алғыс білдіремін», – деді.
Марапатты сонау Арқаның төрінен «AMANAT» партиясының төрағасы Ерлан Қошановтың өзі келіп табыстады. Ол өз сөзінде: «Әлеуметтік зерттеулер нәтижесіне сәйкес, партия көтеріп жүрген өзекті мәселелердің басым көпшілігі халықтың қолдауы мен сенімінен шығып отыр. «ФИРМА БЕНТ» бастауыш партия ұйымы да бұл жүкті бірлесе көтеруде. Мемлекет басшысы өзінің Жолдауы мен сөздерінде партияның рөлін айрықша атап өтті. Партия жобаларына да оң бағасын беріп жатыр. Бұл – біз үшін үлкен абырой және зор жауапкершілік», – деді.
Бүгінгі таңда «ФИРМА «БЕНТ» – теміржол инфрақұрылымы үшін темірбетон шпалдары мен рельсті бекіткіштер шығаратын Қазақстандағы ірі зауыттың бірі. Кәсіпорынның өндірістік қуаты жылына 800 мың шпалдан асады. Өнімнің негізгі тапсырыс берушісі – «Қазақстан Темір Жолы» акционерлік қоғамы. Сондай-ақ аталмыш кәсіпорын жергілікті жерлерде әлеуметтік-экономикалық саланы үдемелі дамытуға, отандық өндірушілерді қолдауға, шағын және орта бизнесті дамытуға бағытталған «AMANAT» партиясының саясатын белсенді түрде іске асырды. Сол үшін де «Үздік бастауыш партия ұйымы» атанды.
Бағдат ШОЙБАС
Іле ауданы
