Кез келген ақпаратты оқып, ой елегінен өткізетін адамдардың көбі мәліметтің рас-өтірігін ажырата алмай жататыны жасырын емес. Әсіресе, апатты және төтенше жағдайлар, саяси оқиғалар кезінде әлеуметтік желілер мен мессенджерлерде жалған хабарламалар лезде тарайды. Күні кеше ҚР Мәдениет және ақпарат министрі Аида Балаева кеңейтілген алқа отырысында медиа кеңістіктегі жалған ақпарат мәселелерін сөз етіп, нақты деректерді саралады.
ҚР Мәдениет және ақпарат министрінің сөзінше, өткен жылы онлайн платформалардағы 67 мыңнан астам заңсыз контент анықталып, 18 мыңнан аса материал жойылған. Өз кезегінде министр Аида Балаева жалған ақпарат пен фейк жаңалықтардың таралуы қоғамда өзекті мәселеге айналғанын атап өтіп, журналистерді жаңалықтар ағынын мұқият қадағалап, расталмаған ақпараттың таралуына жол бермеуге және заңға қайшы контент таратпауға шақырды.
Өз сөзінде министр этносаралық және конфессияаралық қатынастарға баса назар аударды. Бүгінде елімізде 18 конфессияны білдіретін 4 мыңға жуық тіркелген діни бірлестік бар екенін айтып, ізгілік пен рухани құндылықтарды насихаттауда дін саласының орны ерекше екеніне тоқталды.
– Бұл мәселеде заң мен тәртіп қағидасы қатаң орнауға тиіс. Сонда ғана біз бірлік пен тұрақтылықты сақтап, мемлекетімізді нығайта аламыз. Ел ішінде алауыздық туғызып, діни, этносаралық араздықты қоздыру мәселелерін болдырмау үшін жауапкершілікті күшейтуіміз керек, – деді Аида Ғалымқызы.
Министрліктің нақты дерегіне жүгінсек, өткен жылы ұлтаралық араздықты және сепаратизмді қоздыруға ықпал ететін материалдар бойынша Қазақстан Республикасының заңнамасын бұзған 413 факті анықталған.
«Отыз тістен шыққан сөз, отыз рулы елге тарайды» демекші, жуырда ғана Қонаев қаласында мектеп оқушысын көпірдің астында сыныптастары соққыға жығып, жансақтау бөліміне түсті деген ақпарат желі бетін шарлап кеткен болатын. Көп өтпей, желіде тараған «Оқушыны соққыға жықты» деген ақпаратқа қатысты баланың анасы видеоүндеу жасап, нақты жағдайды айтып, оның дақпырт екенін жеткізген еді. Осылайша жалған ақпарат ағынына тосқауыл қойылды. Қазіргі дамыған технология заманында айтылған ақпарат отыз рулы ел былай тұрсын, тұтас Қазақстанды шарлап, әлемді әбігерге салады. Сондықтан сараланған ақпаратқа басымдылық беру маңызды.
Ерзат АСЫЛ
