Жуырда Қарасай ауданының аумағында орналасқан ірі құрылыс материалдары мен үйге арналған тауарлар гипермаркеті «Леруа Мерлен» екі маңызды жайтты атап өтті. Ең алдымен, ашылғанына алты жыл толуын тойласа, екіншіден ребрендинг (брендті жаңарту) жұмыстарының аяқталуы нәтижесінде атауы «Lemana PRO» болып өзгертілгенін хабарлады. Осыған орай мекеме қызметкерлері мен бұқаралық ақпарат құралдары өкілдерінің қатысуымен салтанатты шара өтті.
Гипермаркет директоры Карен Нерсесянның айтуынша, «Lemana PRO» кешенінде күніне 6 мыңнан астам тұтынушыға қызмет көрсетіліп, 40 мыңнан астам тауар түрі ұсынылады. Ай сайын мұнда 150 жүк көлігі қатынап, бір миллионнан астам тауар бірлігі жеткізіледі. Сонымен қатар, олардың 16 пайызы қазақстандық өндірістен шыққанын да айта кеткен жөн.
Гипермаркет ұжымын осы айтулы оқиғамен Қарасай ауданы әкімінің орынбасары Бексұлтан Ақылбек пен облыстық кәсіпкерлер палатасының өкілі, Қарасай аудандық мәслихатының депутаты Елена Константинова құттықтады. Салтанатты шарадан кейін гипермаркеттің жаңартылған сауда залдарына экскурсия ұйымдастырылды.
Карен Нерсесянның айтуынша, ребрендингтің мақсаты – «Lemana PRO»-ны Қазақстан Республикасы аумағында құрылыс және тұрғын үй жабдықтау саласындағы жетекші компания-платформаға айналдыру. Ол өз қатарына бөлшек сауда өкілдері мен кәсіпқойларды да тартпақ. Бұл өзгерістің нәтижесінде «Lemana PRO» енді кәсіби тұтынушыларға көбірек көңіл бөлетін болады, сондай-ақ компания қызметкерлерінің әлеуметтік-экологиялық жауапкершілігі артады. Компания атауының өзгеруі нәтижесінде ұйымдастыру шаралары мен қысқартулар жоспарланбаған. Брендтің өзгеруі гипермаркеттің ағымдағы жұмысына, серіктестермен қарым-қатынасқа және тұтынушыларға қызмет көрсету сапасына әсер етпейді.
Жаңа атаудың мағынасына тоқталар болсақ, француз тілінен аударғанда Le (Leader) нарық көшбасшысы, Ma (Madison) – үй, кеңістік, Na (Nature) – экологиялық және әлеуметтік жауапкершілік, PRO – кәсіби құрылысшыларға арналған, проактивті тәсіл мен жобалық шешімдерге назар аудару дегенді білдіреді екен.
Айта кетерлігі, «Леруа Мерлен» компаниясы Екінші дүниежүзілік соғыстан кейін құрылған болса, посткеңестік кеңістікте Ресейде 20 жыл бойы жұмыс істеп келеді. Жобаға жалпы 30 млн доллар инвестиция салынған. Біздің елде «Леруа Мерленнің» алғашқы және әзірге жалғыз гипермаркеті 2018 жылы тамызда ашылды. Ол ресейлік бизнестің бір бөлігі болып саналады. 2023 жылы француздық «Leroy Merlin» желісі ресейлік бизнесті жергілікті менеджментке беру туралы шешім қабылдады және Ресей Федерациясында оның қаржыландыруын тоқтататынын жариялады. Ресейдегі «Леруа Мерлен Восток» компаниясының 99,9 пайызы Біріккен Араб Әмірліктерінің «Scenari Holding LP» компаниясына берілді. Ал француздық «Adeo» тобы, «Леруа Мерлен» әлем бойынша иеленушісі болып қала отырып, 0,007 пайыз үлесін ғана сақтап қалды. Бұл жағдайдан соң, 2024 жылдың 18 маусымында компанияның Ресейдегі бөлімшесі жаңа «Lemana PRO» брендімен жұмысын жалғастыратынын жариялады. Осыдан кейін Қазақстанда да ребрендинг жүргізілді.
Қуат ҚАЙРАНБАЕВ
Қарасай ауданы
