Кеген ауданы әкімінің орынбасары Кеңес Күнесбайұлының төрағалығымен өткен жиында Дүниежүзілік туберкулезге қарсы күрес күніне орай ұйымдастырылатын айлық барысы талқыланды. Жиынға аудандық санитариялық-эпидемиологиялық бақылау басқармасы, аурухана, білім, ішкі саясат бөлімдерінің қызметкерлері қатысты.
Айлықты өткізудегі мақсат – профилактикалық іс-шаралар мен туберкулездің алғашқы белгілері туралы халықты хабардар ету, медициналық көмекке уақытылы жүгінудің маңыздылығын, емделудің тиімділігін түсіндіру, аурудың алдын алу жұмысын күшейту.
Жиында сөз алған аудандық санитариялық-эпидемиологиялық бақылау басқармасының бөлім басшысы Әйгерім Ташкенбаева туберкулез сырқаттанушылығының эпидемиологиялық жағдайы туралы өткен жылдың қорытындысымен таныстырды. Ал туберкулездің белсенді түрімен есепте тұрған науқастардың жағдайы туралы аудандық аурухананың фтизиатр-дәрігері Айжан Ұйқасбаева хабарлады.
Дүниежүзілік туберкулезге қарсы күрес күніне орай өтетін айлық барысы да кеңінен сөз болды. Аудандық санитариялық-эпидемиологиялық бақылау басқармасының жетекші маманы Шырын Өзекбаева туберкулездің алдын алу бойынша медиа-жоспардың жүзеге асырылу жайын баяндаса, білім бөлімінің бас маманы Аяулым Кішібаева білім беру ұйымдарында өткізілетін акциялар туралы мәлімдеді. Аудандық аурухана директорының орынбасары Мұрат Серікұлы айлық кезінде атқарылатын санитарлық ағарту жұмыстарына жан-жақты тоқталды.
Жиын соңында аудан бойынша туберкулез дертіне эпидемиологиялық талдау жүргізіліп, оның нәтижесіне сай аурудың алдын алу мақсатында атқарылуы тиіс іс-шаралар белгіленді. Сондай-ақ Дүниежүзілік туберкулезге қарсы күрес күніне орай айлықтың жоспары құрылып, бекітілді.
Дәурен ӘБУТӘЛІПОВ,
Кеген ауданы
