Алматы облысы тағы бір бокс чемпионымен толықты. Алатау қаласының 17 жасар тұрғыны Регина Тибенева Черногорияның Будва қаласында өтіп жатқан «Адриатика маржаны» халықаралық турнирінде алтын медаль иеленді.
Әлем кубогі мәртебесіне ие жарыста ол 57 келіге дейінгі салмақта қарсылас шақ келтірмеді. Финалда отандасы Ақнұр Тұрсынғалимен кездесіп, 3:2 есебімен жеңіске жетті. Осылайша Регина Тибенева халықаралық доданың чемпионы атанды.
Регина – «Жетіген» шағынауданындағы №11 орта мектептің 11-сынып оқушысы. Бірінші сыныптан бастап бокспен айналысып келеді. Анасы Юлия Генадьевна қазір үй шаруасында, кіші қызын тәрбиелеп отыр, ал әкесі Виталий Николаевич «Гелиос» компаниясында құрылыс жөніндегі бас маман болып жұмыс істейді. Боксшы қыз бірнеше рет республикалық және халықаралық жарыстардың жүлдегері болды. Қазір Өтеген батыр кенті «Жігер» спорт мектебінде жаттығып жүр. Бокстан спорт шеберіне үміткер атағын иеленген. Сыныпта өте қарапайым, еңбекқор, тәрбиелі. Ол әрқашан жақындарына, туыстарына, достары мен сыныптастарына көмек қолын созуға дайын тұрады.
Отанына жеңіспен оралған чемпионды жерлестері салтанатпен қарсы алып, өзі білім алып жүрген мектебінде кездесу өткізді. Алатау қаласының әкімі Әркен Өтенов чемпион қызды арнайы барып құттықтады. Регинаның болашақта осы спорт түрінен әлемде топ жарсам деген арманы бар. Сол мақсатына жетсін деп тілейміз!
Бағдат ШОЙБАС
Алатау қаласы
