Қонаев қаласында футболдан облыстық ашық турнир өз мәресіне жетті. Аталған жарыс балалар футболының бапкерлері Валерий Бочеваров пен Константин Муратидиді еске алуға арналды. Турнирге еліміздің бірнеше аймағынан, Алматы облысының барлық ауданы мен Қонаев қаласынан 2011-2012 және 2013-2014 жылдары туған балалар мен жасөспірімдер қатысты.
«Жарыстың мақсаты – балалар футболын дамыту және жас ойыншылардың шеберлігін шыңдау. Валерий Бочеваров пен Константин Муратиди саналы ғұмырын бапкерлік қызметке арнаған, спортшылардың бірнеше буынын тәрбиелеген білікті бапкерлер болатын. Алматы облысындағы балалар футболын дамытуға өз үлестерін қосты. Турнир биыл тоғызыншы рет ұйымдастырылып отыр», – деді ОМБЖСМ директоры Бекежан Турлыбеков.
«Былтыр «Konaev cap» турнирінде жүлдегер атандық. Қонаев қаласына тағы да бақ сынауға келдік. Балаларды осындай жарыстарға көптеп қатыстырсақ, тәжірибесінің толығуына, айтулы додаларда үздік нәтиже көрсетуіне жол ашатынымыз анық», – деді Қызылорда облысы «Орда» футбол клубының бапкері Айболат Едіге.
Турнир қорытындысы бойынша, 2011-2012 жылдары туған жасөспірімдер арасында І орынды Қонаев қаласындағы ОМБЖСМ, ІІ орынды Талдықорған қаласындағы ОМБЖСМ спортшылары иеленді. Ал ІІІ орын Түркістан облысына қарасты балалар мен жасөспірімдер спорт мектебінің футболшыларына бұйырды.
2013-2014 жылы туғандар арасында Павлодар облысының «Ақсу» командасы үздік шықты. Екінші орын Қарасай ауданының «Үшқоңыр» командасына бұйырды. Ал жүлделі ІІІ орынды Қонаев қаласындағы ОМБЖСМ шәкірттері иеленді.
Қонаев қаласы
