Жүзінен жылылықтың шуағы мен мейірімі ұшқындаған жаны жомарт жандар аз емес. Алғыс арқалап жүрген сондай азаматтардың қатарында Іргелі ауылдық ардагерлер ұйымының төрағасы Егінбек Егеубеков те бар.
Оның бұдан бұрын да халыққа жасаған қайырымдылық істері көпшілік назарынан тыс қалмады. Ол мұқтаждықпен алдына барған адамды құралақан қайтармайды. Былтыр қыста отын тапшылығын тартқан жеті отбасының мүшелеріне өз қаражатына көмір түсіріп берген. Көксай ауылының тұрғындары Ирина Долматова, Сандуғаш Исаева, Светлана Кустова, Айсәуле Бексұлтанова, Іргелі ауылынан Дина Бахтинова, Кемертоған ауылынан Нұргелді Шалабаевтар қарияның қамқорлығына ерекше риза.
– Бұлардың ішінде Кемертоған ауылындағы орта мектептің 6-сыныбында оқитын жетім бала Темірлан Жанатұлының жөні мүлде бөлек. Ол бір бөлмелі үйде жалғыз өзі тұрады. Оған менің қамқорлығым басқаша. Отын мен көмір, азық-түлік, киім-кешек жағынан үнемі көмектесіп тұрамын, – дейді Егінбек Егеубеков.
«Халық айтса, қалт айтпайды» деген рас сөз. Ардагердің азаматтық ісіне ризашылығын білдіріп жатқан жұртшылық «Қамқорлық деп осыны айт!» деп ағынан жарылады. Шындығында, халықтың қамын жеген Егінбек Егеубековті қалай дәріптесе де жарасады.
Қанат ТӘКЕБАЕВ
Қарасай ауданы
