«Әлеуметтік кәсіпкерлік субъектісі» тізіліміне енгендер мемлекеттік грант алуға құқылы. Бұл туралы Өңірлік коммуникациялар алаңында өткен баспасөз мәслихатында Алматы облысы кәсіпкерлік және индустриялық-инновациялық даму басқармасының бөлім басшысы Райымбек Иемберді айтты. Жоғарыда аталған тізілімге жеке кәсіпкер немесе заңды тұлға ғана қосыла алады.
«Әлеуметтік кәсіпкерлік субъектісі» тізіліміне төрт санат бойынша тіркеле алады. Мәселен, халықтың әлеуметтік осал топтарына жататын адамдардың кемінде екеуін жұмысқа қабылдағандар, аталған санатқа кіретін тұлғалар өндірген өнімді немесе қызметінің іске асуына ықпал еткендер мен, қызмет түрлеріне байланысты жұмыс істеп отырғандар тізімге еніп, мемлекеттік грант алуға үміткер бола алады.
«Дара кәсіпкерді немесе заңды тұлғаны тізімге енгізуге арналған өтініштер күнтізбелік тоқсанның алдындағы айдың 1-нен 15-не дейінгі аралықта қабылданады», – деді спикер.
Айта кетейік, мемлекеттік грантқа құжат қабылдау «Kezekte.kz» электрондық порталы арқылы іске асырылады, қаражат көлемі – 5 млн. теңгеге.
Былтыр 24 өтініш қабылданып, 74,6 млн. теңгенің 15 жобасы қаржыландырылды. Биыл грант сомасы айтарлықтай өсіп, жалпы сомасы 370 млн. теңгеге жеткен.
