Талғар ауданында қыс маусымының аяқталуына орай Масленица мерекесі өтті. Бұл – қарлы да аязды күнмен қоштасып, жылы леп есіп, жылғалардан су ағатын көктемді қарсы алуға арналған славян халықтарының мерекесі. Қазақстанның кей өңірлерінде дәстүрге айналған осынау шараны Талғар қаласының әкімдігі мен беларусь этномәдени орталығы ұйымдастырды.
Мәдениет үйінің аумағындағы алаңда сахна бой көтеріп, мерекелік шара «Калинушка» балалар ансамблінің орындауындағы «Калинка» биімен басталды. Талғар қаласының әкімі Арыстанбек Әбілқайырұлы сөз сөйлеп, жиналған көпшілікті айтулы күнмен құттықтады.
– Бұл – өзара түсіністік, бір-бірін құрметтеу мерекесі. Біз әрқайсымыз әр ұлттың өкілі болғанымызбен, бәріміз Қазақстанның бейбіт аспаны астында бірге өмір сүріп жатырмыз. Сол бейбіт өмір мәңгі болсын! Баршаңызды мерекемен құттықтаймын, денсаулық, бақыт, игілік және бақ-береке тілеймін, – деді қала басшысы.
Беларусь этномәдени орталығының төрағасы Жанна Третьяк славян халықтарының Масленица сияқты ежелгі мерекелер мен көне дәстүрлерді насихаттаудағы рөлін атап өтті. «Іле-Алатау» ұлттық паркінің экологиялық ағарту және туризм жөніндегі маманы Самал Әбілова да аталған мереке халықтар достығын нығайтуға үлес қосып жатқанын тілге тиек етті.
Алаңға жиналған жұрт құймақтан, дәмі тіл үйіретін түрлі астан ауыз тиді. Аудандық Оқушылар үйі ұйымдастырған концерттік бағдарлама қатысушыларға мерекелік салтанат сыйлап, көңіл-күйін көтерді. Шараның шарықтау шегі алаңның ортасында орналасқан және қыстың соңын бейнелейтін тұлыпты жағу болды.
Бұл мереке ұлттық ерекшеліктеріне қарамастан, баршаны біріктіріп, олардың бойында бейбітшілік, ізгілік пен мейірімділік сезімдерін ұялатады деген сенімдеміз.
Құтмағамбет ҚОНЫСБАЙ
Талғар ауданы
