Кеген ауданы Ұлыстың ұлы күнін «Наурызнама» онкүндігін негізге ала отырып атап өтуде. Соның ішінде қайырымдылық шарасына басымдық берілді. Мерекеге орай үйден оқитын мүмкіндігі шектеулі балаларға арналған «Наурыз кәдесі» атты іс-шара бастау алды.
Қайырымдылық – ең ізгі қасиеттердің бірі. Мұқтаж жандарға қамқорлық жасау – ата-бабадан келе жатқан дәстүр. Адамдар бір-біріне мейірімділік таныту арқылы жақсылық жасайды.
Ө.Жаңабаев атындағы орта мектептің әкімшілігі қамқорлық акциясы аясында үйден оқитын, аз қамтылған отбасылардан шыққан оқушыларға Ұлыстың ұлы күні – Наурыз мерекесі қарсаңында сыйлықтар таратты. Балалардың жүздері қуаныштан бал-бұл жайнады, ата-аналары мектеп ұжымына ризашылық білдірді.
– Біз мүмкіндігі шектеулі балаларға әркез қайырымдылық жасауға асығамыз. «Қуанса, бала қуансын!» деген сөз бекерге айтылмаған. Жас ұрпақтың жарқын болашағы үшін бәріміз тер төгуге міндеттіміз. Осындай жарқын іс адамдарды мейірім мен парасатқа, бірлік пен ынтымаққа үндейді, – деді мектеп директоры Динара Жетібаева.
Қайырымдылық іс-шарасы барысында балаларға тәттілер мен ойыншықтар, мектепке қажетті құрал-жабдықтар үлестірілді. Ауданда Наурыз мерекесі аясында осындай игі шаралар жалғаса бермек.
Дәурен ӘБУТӘЛІПОВ
Кеген ауданы
