Іле ауданында Ұлыстың ұлы күні – Наурыз мерекесінің онкүндігі игі істермен жалғасын табуда. Өтеген батыр ауылындағы орталық арбатта «Ұлыстың ұлы күні – Наурыз!» мерекесі кең көлемде атап өтілді.
Думанды шараға облыс әкімі Марат Сұлтанғалиев арнайы ат басын бұрды. Арбаттағы мерекені облыс басшысы тұсау кесу салтымен бастады. Аудандық ақсақалдар кеңесінің төрағасы Мақсат Седалиев атамыз бүлдіршінге ақ батасын берді. Тұсауын кескен балақайдың есімі Қуаныш Құнанбай, ата-анасы жас отбасы отағасы Жанат Тазабеков, анасы Лия Талғатқызы Өтеген батыр кентіндегі №13 орта мектептің ұстаздары екен. Алғашқы қуаныштарының тұсауын ел ағаларына кестіруге ырымдап, дайындапты. Болашақта ел тұтқасын ұстар алаштың азулы азаматтарының бірі болсын, дейді жас ата-ана. Одан кейін құрметті қонақтар аудандық дербес бөлімдер, ауыл әкімдіктері мен мемлекеттік мекемелердің тіккен шатырларын аралап, ұлттық тағамдардан дәм татып, бата берді. Аралау барысында аудан тұрғындарына арнап жайылған ақ дастарханға барып, мерекемен құттықтады.
Сондай-ақ, әр шатырда қазақы салт-дәстүрге тән тұсау кесер, қыз ұзату, ұршық иіру, жүн түту секілді ғұрыптарды тамашалап, қол өнер, сурет сынды көрмелермен танысты.
Арбаттағы қаздай қатар тігілген шатырларды аралап болған соң облыс әкімі мен аудан әкімі Қайыржан Жақсымбетов орталық стадиондағы наурыз мерекесіне ұйымдастырылған театрландырылған сахнада қалың жұртшылықты Наурыз мерекесімен құттықтады.
– Сіздерді Ұлыстың ұлы күні – Наурыз мерекесімен шын жүректен құттықтаймын! Ұлыс оң болсын! Халқымыз үшін Наурыздың орны ерекше. Наурыз – жанға шуақ, жүрекке жылулық сыйлайтын мереке. Наурыз – жылдың басы ғана емес, жаңару мен жаңғырудың айқын белгісі. Ауданымыз жылдан жылға қарыштап дамып келеді. Биыл ауданымызда Ұлы жеңістің 80 жылдық мерейтойы да кең көлемде тойланады. Мұндағы игі істердің бәрі аудан халықының ауызбіршілігімен жүзеге асуда. Қазақ халқының қастерлі мерекесі тағы да құтты болсын. Еліміз аман,жұртымыз тыныш болсын – деді.
Сондан кейін орталық стадион төріндегі айрықша мерекеде концерттік бағдарлама ұсынылды.
Мерекеде Наурыз, ұлттық мәдениет пен салт-дәстүр мен әдет-ғұрыптар дәріптелетін әндер шырқалды. Ауданға, облыс және республикаға танымал әншілер өнер көрсетті. Киіз үйлер тігіліп, қонақтарға есігін айқара ашты.
Күндізгі сағат 10.00-де салтанатты түрде бастау алған мерекелік шара біршама уақыт жалғасып, концерттік бағдарламалар мен театрландырылған көріністер, ұлттық спорт ойындарынан, соның ішінде қазақ күресі, қол күрес, арқан тарту, асық ату, сынды сайыстар өткізілді.
Бағдат ШОЙБАС,
Іле ауданы
