Облыс әкімі Марат Сұлтанғазиев ҰБТ-ның наурыз айындағы сынағында ең жоғары 140 балл жинап, үздік нәтиже көрсеткен Еңбекшіқазақ ауданындағы Толқын орта мектебінің оқушысы Санжар Қуандықпен кездесті. Аймақ басшысы дарынды түлектің жетістігін жоғары бағалап, жалынды жасқа жарқын болашақ тіледі.
Облыстық білім басқармасының басшысы Салтанат Беспаева, Еңбекшіқазақ аудандық білім бөлімінің башысы Арайлым Төлеубекова мен Толқын орта мектебінің бірқатар ұстазы қатысқан жүздесуде аймақ басшысы дарынды шәкіртті үздік жетістігімен құттықтады. Өңірдің білім беру саласындағы оң көрсеткіштерге тоқталып, мектеп инфрақұрылымын жаңғырту, оқушылардың қауіпсіздігін қамтамасыз ету бағытында ауқымды жұмыс атқарылып жатқанын айтты. Әсіресе, ауылдық жердегі мектептердің білім беру сапасы күннен-күнге жақсарып, өңір түлектері жыл сайынғы Ұлттық бірыңғай тестілеуде ел бойынша үздік нәтиже көрсетіп келе жатқанын алға тартты. Облыс басшысы өз сөзінде биыл мектеп бітіруші түлек Санжар Ғалымжанұлының үздік көрсеткіші – сол игі дәстүрдің жалғасы екенін атап өтті.
– Бүгінгі жетістігің біз үшін зор мақтаныш. Бұл – білімге деген үлкен қызығушылығың мен табандылығыңның айғағы. Сенің болашағың жарқын. Алда талай биікті бағындырып, еліміздің дамуына өз үлесіңді қосатыныңа сенемін. Әрине, бұл тұста ата-анаңның қолдауын ерекше атап өткім келеді. Олардың берген тәрбиесі сенің биік мақсаттарға ұмтылуыңа түрткі болды. Ұстаздар қауымына да алғыс білдіргім келеді. Жас ұрпаққа білім берудегі олардың еңбегі зор. Мемлекетіміз жастардың сапалы білім алуына барынша жағдай жасап келеді. Бұл – ортақ еңбектің жемісі. Бүгінде облыстың ғана емес, еліміздің мақтанышына айналдың. Болашағың жарқын болсын! – деді Марат Елеусізұлы.
Білім аламанында маңдайы жарқырап, еліміздің мақтанышына айналған Санжар Ғалымжанұлы өзінің болашақ арманымен бөлісті. Дарынды шәкірт ұстаз болғысы келетінін, осы орайда Абай атындағы Қазақ ұлттық педагогикалық университеті немесе SDU-да қазақ тілі мен әдебиеті мамандығы бойынша білім алуға бел байлап жүргенін жеткізді.
– ҰБТ-ға дайындықты өткен жылдың тамыз айында бастадым. Сөйтіп, күн сайын барлық пәнді үзбей пысықтап отырдым. Кейін «Juz40» білім беру орталығында жүйелі түрде дайындалдым. Бір күнімді бос жібермей оқып, еңбектендім. Соның арқасында ең жоғары 140 ұпайды жинау мүмкін болды. «Дүние де өзі, малда өзі, Ғылымға көңіл бөлсеңіз» деген Абай тұжырымын бойыма тұмар тұтып келемін. Өйткені мен ұлы ойшылдың даналық сөздерінен айрықша қуат аламын.Меніңше, Абай тағылымын зерделеген жан арманынан адаспайды, – дейді Санжар Ғалымжанұлы.
Санжардың анасы Жадыра Әділқызы да ұлының жетістігіне қуанышты екенін жасырмады.
– Санжар білімге құштар. Бірнеше мәрте республикалық және облыстық оқуларда жеңімпаз атанды. Ол өзінің өмірлік мұраты үшін өрге жүзіп келеді. Балалардың жандүниесіне үңіліп, оларға қолдау көрсету маңызды. Ата-ана ретінде біз онымен көп сырласып, тап болған мәселелерді бірге шешуге күш салып келеміз. Ол бүгін шынымен алға қадам басты. Десе де, болашақта талай биік белесті бағындыруға сенімді, – деді ол.
Кездесу соңында облыс әкімі дарынды шәкіртке 500 мың теңгенің сертификатын, ал анасы мен ұстаздарына Алғыс хат табыстады.
Ерзат АСЫЛ
