«Таза Қазақстан» акциясына өңір кәсіпкерлері белсенді түрде атсалысуда. Оған облыстық кәсіпкерлік және индустриялық-инновациялық даму, тұрғын үй-коммуналдық шаруашылық және абаттандыру басқармалары ұйытқы болып отыр. Бұл іс-шараға «Атамекен» өңірлік кәсіпкерлік палатасы да өз үлесін қосуда.
Шараның басы-қасында жүрген облыстық кәсіпкерлік және индустриялық-инновациялық даму басқармасының бас маманы Райымбек Емберді акция туралы былайша мәлімет берді:
– Облысымыздың кәсіпкерлері мен 16 кәсіпорын қызметкерлері бұл іске атсалысуда. Акция аясында 1200 түп ағаш отырғызылып, 50 тонна қоқыс шығарылмақ. Облыстың экологиялық ахуалын жақсартуға бағытталған бұл іс 27 мамырға дейін жалғасын табады. Отырғызылған ағаштар қатарында қайың, терек, арша және жеміс ағаштары бар. Дәл бүгінгі шара барысында 30 түп ағаш отырғызылды. Мұндағы жұмысқа «Юнипак-Шымкент» ЖШС-ның 18 қызметкері тартылды. Ал «ПепсиКо» ЖШС қазіргі таңға дейін Алатау қаласында 870 түп ағаш отырғызды. Облыстың барлық ауданына көшеттер жеткізілді. Акция аясында ағаш отырғызудан бөлек, тазалық жұмыстары да жүргізіліп жатыр. Кәсіпорындар мен шағын кәсіпкерлік нысандары әр сенбі сайын өз аумақтарын тазалауда.
Облыстық кәсіпкерлер палатасының баспасөз хатшысы Назерке Ермекқызы да акция турасында мағлұмат берді.
– Біздің мекеме мұндай шарадан тыс қалмайды. Өткен жылы да акцияға белсенді қатысқанбыз. Негізінде кәсіпкерлер палатасы кәсіпкерлердің құқықтарын қорғап қана қоймай, қажет болған жағдайда көмек қолын созып отырады. Біз бүгін 50-ден астам шырша мен арша көшеттерін отырғызбақшымыз, – деді ол.
Ағаш отырғызу – жасыл әрі таза орта қалыптастырудың алғышарты. Бұл шара жергілікті тұрғындардың экологиялық сана-сезімін қалыптастырып, жасыл-желекпен қоршалған қалаға деген сүйіспеншілігін арттырады деген сенім мол.
Бейбіт МЕКЕЕВ
