Іле ауданындағы балалар мен жасөспірімдер спорт мектебінде 2011-2012 жылдары туған жасөспірімдер арасында футзалдан облыстық чемпионат өз мәресіне жетті. Жарыстың ашылу салтанатында Алматы облыстық дене шынықтыру және спорт басқармасының, облыстық дене шынықтыру мен спортты дамыту орталығының өкілдері, балалар футболының бапкерлері сөз сөйлеп, қатысушыларға сәттілік тіледі.
«Футзалдан жасөспірімдер арасындағы облыс чемпионаты көп жылдан бері дәстүрлі түрде өткізіліп келеді. Балалар алаңда бәсекеге түскенімен, өмірде жақсы достар. Олар облыстық құрама команда сапына кірсе де, бір-бірімен тез тіл табысады. Аталған чемпионат Іле ауданындағы балалар мен жасөспірімдер спорт мектебінің үлкен залында халықаралық талапқа сай өтті. Мұнда бар жағдай жасалған. Біздің мақсатымыз – мектеп жасындағы балаларды командалық спортқа барынша тарту. Облыста футболды дамытуға ерекше көңіл бөлінуде. Бұл спорт түрі балаларды салауатты өмір салтын ұстануға, бос уақытын тиімді өткізуге және отансүйгіштікке тәрбиелейді. Үздік ойыншылардың ұлттық құрама команда сапында өнер көрсетуіне жол ашады», – деді жарыстың бас төрешісі Қайсар Қиса.
Жарыс ФИФА бекіткен халықаралық футзал ережесіне сәйкес 5х5 форматында (U-15) ұйымдастырылды. Матчтар регламент бойынша 20 минуттық 2 таймнан тұрды. Чемпионатқа Алматы облысының жеті ауданынан 12 команда қатысты.
Бес күнге созылған жарыс қорытындысы бойынша, бірінші орынды Жамбыл аудандық БЖСМ жеңіп алды. Екінші орынды Қарасай ауданындағы «Үшқоңыр» балалар мен жасөспірімдер спорт мектебі еншіледі, ал үшінші орынды Ұйғыр аудандық БЖСМ иеленді.
Жарыс футзалды кеңінен насихаттау және жас футболшылардың шеберлік деңгейін арттыру мақсатында өткізілді. Ең үздік ойыншылар Алматы облысының құрама командасына іріктеліп, биыл жазда еліміздің қалаларының бірінде өтетін Қазақстан чемпионатына қатысуға мүмкіндік алады.
