Қазақстан Жазушылар одағында дәстүрлі әдеби жыл қорытындысы өтті. Қаламгерлердің өткен жылы жарық көрген кітаптары сараланды. Жүзден озған жүйріктер анықталып, одақ тағайындаған арнайы сыйлықтармен марапатталды. Солардың қатарында Алматы облыстық «Алатау арайы» мен «Огни Алатау» газеттерінің, өңірлік коммуникациялар қызметі мен ақпараттық сайттардың басын қосқан «Өлке тынысы» ЖШС директоры, белгілі ақын Кәдірбек Құныпияұлы да бар. Әріптесіміз «Талтүс» атты жыр жинағы үшін Халықаралық «Алаш» әдеби сыйлығының лауреаты атанды.
Кәдірбек Құныпияұлы – қазақ әдебиетін дамытуға өз үлесін қосып келе жатқан айтулы қаламгер. Ақын талғампаз оқырманын әркез тұщымды шығармаларымен қуантып келеді. Халықаралық «Алаш» әдеби сыйлығын қаламгер жетістігінің бірі деп бағалаймыз.
Арқалы ақынға шалқар шабыт, амандық пен абырой тілейміз!
«Алатау арайы» газетінің ұжымы
