Облыстық қоғамдық келісім және даму орталығының ұйымдастыруымен Еңбекшіқазақ ауданында «Бақытты ана – бақытты бала» тақырыбында семинар өтті. Ақ жаулықты әжелер мен аналар бас қосқан кездесуде бала тәрбиесінен бөлек, әйел затының жеке тұлға ретіндегі рөлі, нәзік жандылардың болмысы мен бет-бейнесі жөнінде де ой өрбіді.
Отбасының қорғаны, тірегі – әке болса, ошақтың ұйытқысы мен берекесі – ана. Егер ана бақытты болса, бала да бақытты. Дегенмен, болмысынан нәзіктік пен сұлулықтың, мейірім мен жылулықтың символы болған әйел заты күйбең тірліктің тауқыметімен өзін әркез кейінге ысырып, бала мен отбасын бірінші орынға қоятыны жасырын емес. Әр адам өзін сыйлап, жақсы көруді ұмытқан кезде оның айналасына төгер шуағы да солғын болатынын психолог мамандар айтып келеді.
Осы орайда әр шаңырақта бүгінде бала тәрбиесіне көп үлес қосатын аналар екенін ескерсек, олардың жай-күйі, психологиялық-эмоционалды жағдайы үлкен маңызға ие екенін де аңғару қиын емес. Сәбиін мейірлене отырып емізудің де бала тәрбиесінде алар орны ерекше. «Әке ұлды тәбиелейді, ана тұтас ұлтты тәбиелейді» деген ата-бабаларымыз сол ерекшелікті ертеден түсінген. Кездесу барысында Зере әже секілді қазақтың дана әжелері, текті арулары, есімі бір руға айналған алып аналары жайында да кеңінен айтылды.
Облыстық Аналар кеңесінің төрағасы Гүлнар Жошыбаева, Жамбыл облыстық «Анаға тағзым» отбасын қолдау орталығының басшысы Эльмира Мырза-Ғали, психолог Жеңісгүл Хабаева және педагог, білім беру ісінің құрметті қызметкері Жұлдыз Әуелбековалар сөз сөйлеп, семинарға қатысушылармен пікір алмасты. Жеңісгүл Хабаева өз тәжірибесіндегі түрлі жағдайларға тоқталып, ана мен бала тәрбиесінде тасада қалатын жайттар жайында айтты. Сондай-ақ семинар қатысушыларына шағын психологиялық тренинг өткізіп, ақыл-кеңесімен бөлісті.
Ертеңгі күні ел тұтқасын ұстар бүгінгі ұл-қыздарымыздың білімді де, тәрбиелі, өресі биік, көкжиегі кең, ұшқыр ойлы, өнерлі, жалпы, жан-жақты қабілетті болып өсуі оларға тәлім-тәрбие беріп, оң-солын танытып отырған аналарына тікелей байланысты. Ендеше, бақытты ананың балалары – ертеңгі саналы да, сапалы ұрпақ екенін ескергеніміз абзал.
Құралай МҰРАТҚЫЗЫ
Еңбекшіқазақ ауданы
