Ақпараттық түсіндіру жұмыстарымен жүрген кезде ата-аналардан: «Балаларымызды жат ағымдардан қалай қорғаймыз?» деген сұрақты жиі естиміз. Осы мәселеге қатысты бірнеше кеңесті алға тартқымыз келеді.
“Бала мен ит қорыған жерге өш” дегендей, баланы діннен алшақтата берудің қажеті жоқ. Себебі, бәріміз жан мен тәннен жаралғандықтан, бәрібір рухани азыққа мұқтажбыз. Ертелі-кеш бала да әйтеуір бір жерден рухани азық іздейді. Сөйтіп жүріп дұрыс емес ақпаратқа тап болуы әбден мүмкін. Сол үшін баланы діннің негізгі құндылықтарымен, ахлақи принциптерімен және дұрыс діни мәліметтермен қаруландыру қажет. Рухани иммунитеті дұрыс болған бала жат ағымдардан қорғана алатын болады.
Діни ақпараттарды сенімді ұстаздар мен дұрыс діни орындардан үйренуін қамтамасыз етуіміз қажет. Себебі, бала көкейде жүрген сұрағын кімнен және қайдан алуы тиіс? Көлденең көк аттыдан діни сұрақ сұралмайтынын еске сақтағаны жөн.
Балаңызбен үнемі және ашық байланыста болыңыз. Туындаған сұрағына жауап беріп, қате ақпараттарға және теріс бағыттарға барынша мұқият болуы керектігін үйретіңіз. Араласатын ортасын жақсы тануға тырысыңыз. Достары кім екеніне, қандай шараларға қатысып жүргеніне, кімдермен уақыт өткізетініне мән беріңіз. Теріс әсерлі орталардан қашық жүруіне ықпал етіңіз. Қазақ “қызың өссе, қызы жақсымен, ұлың өссе, ұлы жақсымен ауылдас бол” деп бекер айтпайды.
Балаңызға критикалық-аналитикалық ойлауды үйретіңіз. Қандай да бір діни білімге немесе ақпаратқа құлай сенбей, әуелі сыни ойдың сүзгісінен өткізуге дағдыландырыңыз. Әлеуметтік желілер мен интернет ресурстарда жалған және бұрмаланған ақпараттардың да жүретінін түсіндіріңіз. Әсіресе, дінге қатысты сауалдардың бәріне интернеттен жауап іздеуге болмайтынын айтыңыз.
Міне, баласының болашағына алаңдайтын әрбір ата-ана осы тектес мәселелерге мән беруі керек. Оған ерте бастан назар аудармаса, ертеңгі күні бала теріс жолға түсіп кетіп, опық жегізіп, бармақ шайнатуы мүмкін. Ол кезде бәрі кеш болады. Құдай содан сақтасын!
Салтан Сайранұлы,
дінтанушы
