Шелек ауылындағы Жақсылық Үшкемпіров атындағы дене шынықтыру және сауықтыру кешенінде бокстан КСРО спорт шебері, ардагер-жаттықтырушы Қуаныш Абдрахмановтың жүлдесіне арналған 2011-2012 жылғы кіші жасөспірім ұлдар, 2010-2011 жылғы қыздар арасындағы республикалық деңгейдегі ашық турнир өтті.
Қуаныш Нұрқанұлы – Шелек ауылының тумасы. Алматыдағы Қазақ денешынықтыру институтын тәмамдаған. Есік қаласы мен Шелек ауылындағы балалар мен жасөспірімдер спорт мектебінде жаттықтырушы болды. Астана қаласындағы №60 лицейде және М.Жұмабаев атындағы жоғарғы халықаралық колледжінде ұстаздық етті. Ол боксты жастайынан серік етіп, 7-сыныптан бастап жаттықтырушы Нұрғали Мәнкеевтің қол астында жаттықты. Алматы облысында, Көкшетау қаласында өткен республикалық жарыстың жеңімпазы болды. Қазақстан Республикасы чемпионатында 1-орын, ал Ресейдің Омск қаласында өткен бүкілодақтық жарыста жүлделі 3-орын иеленді.
Жарыстың салтанатты ашылуына аудандық мәслихаттың хатшысы Бекет Ахметов, басқа да белсенді азаматтар қатысып, сөз сөйлеп, білікті бапкердің еңбегіне табыс, жас боксшыларға жекпе-жекте сәттілік тіледі. Сондай-ақ бұл шараға Қуаныш Нұрқанұлының әріптестері, достары, шәкірттері қатысып, сый-сияпаттарын жасап, шапан жауып, ат мінгізді.
Төрт күнге созылған бұл жарысқа Астана, Тараз, Шымкент, Жетісу, Алматы облыстарынан 12 команда, 120 боксшы ұл мен қыз қатысты. Бозкілем үстіндегі жекпе-жекте Ж. Үшкемпіров атындағы спорт мектебінің 9 боксшысы дара шығып, алтын медальды жеңіп алды. Ал жүлделі 2 және 3-орындарды Кеген мен Жаркент ауданының жас былғары қолғап шеберлері иеленді.
Жеке номинация бойынша Ж. Үшкемпіров атындағы спорт мектебінен Амир Мұқаш үздік техника көрсеткені үшін марапатталса, №2 Шелек балалар мен жасөспірімдер спорт мектебінен Әлихан Исламов және қыздар арасынан астаналық Гүлнәз Атабай «Үздік боксшы» атанды. Ал «Ең үздік боксшы» атағына Ж.Үшкемпіров атындағы спорт мектебінің жас өрені Сман Темірхан лайық деп танылды.
Жарыста жеңімпаз болған былғары қолғап шеберлеріне арнайы медальдар, заттай сыйлықтар, алдыңғы үш орынға ие болған командаларға кубоктар мен Алғыс хаттар табыс етілді.
Анарбек МӨКІШҰЛЫ
Еңбекшіқазақ ауданы