Облыс әкімі Марат Сұлтанғазиев қытайлық «Jiangsu Kangyyitong Technology Co.,Ltd» компаниясының өкілдерімен кездесіп, жаңа инвестициялық жоба жайын талқылады.
Кездесу барысында «Jiangsu Kangyyitong Technology Co.,Ltd» компаниясының басшысы Даи Юэюэ облыс әкіміне кәсіпорынның әлеуетін таныстырып, өңірге инвестиция салуға қызығып отырғанын жеткізді. Оның сөзінше, аталған компания медициналық емдеу мен құрылғыларды онлайн сату, жаңа технологиялық өнімдерді өндіру, электронды коммерция мен IT сынды салаларда қызмет көрсетеді.
– Алматы облысы – инвестициялық жағынан тартымды аймақ. Оның үстіне бұл өңірде көлік дәлізі жақсы дамыған. Біз осы мүмкіндікті ескере отырып, өңірлеріңізге емдеу-сауықтыруға негізделген жаңа индустриялық кешен салуды көздеп отырмыз. Индустриялық кешен аумағында денсаулық сақтау, қызмет көрсету, іскерлік байланыс және зерттеу орталықтары орын тепсе деген ойдамыз. Жоба жүзеге асса, 4 мыңға жуық адамды тұрақты жұмыспен қамтуға күш саламыз, – деді «Jiangsu Kangyyitong Technology Co.,Ltd» компаниясының басқарма төрағасы.
Өз кезегінде аймақ басшысы Қытайдан келген инвесторлармен өзара іс-қимыл облыстың экономикалық дамуы үшін маңызды екенін атап өтті.
– Мұндай инвестициялар көбінесе жұмыс күшінің біліктілігін арттыратын және жалпы саланың дамуына ықпал ететін технологиялар мен білім трансфертін қамтиды. Қытаймен ынтымақтастықтың оң тәжірибесі жаңа инвестициялар тартуға және өңір экономикасының басқа да секторларын дамытуға мүмкіндік береді, – деген, аймақ басшысы аталған инвестициялық жобаның жан-жақты зерделенетінін, ұсыныстар ескерілетінін жеткізді.
Ерзат АСЫЛ
