Қазақ тілі – өте бай, айтылуға орамды, көркем тіл. Мемлекеттік тілдің қолдану аясын кеңейтіп, оны шын мәніндегі қарым-қатынас тілі ету – бүгінгі күн талабы. Тәуелсіз мемлекетімізде қоғам өмірінің барлық саласында қазақ тілінің кеңінен қолданылуын қамтамасыз ету – басты мақсатымыз.
Қазақстанда бір шаңырақ астында өмір сүріп жүрген түрлі ұлттар мен ұлыстардың бірлігі, ынтымағы басқа мемлекеттерге үлгі. Осы орайда қазақ тілін меңгеруге ниеттеніп, бірге үйренуге шақырып жүрген Халықаралық «Қазақ тілі» қоғамы Алматы облыстық филиалының мүшесі, этнос өкілі Наталья Батракова жайлы сөз қозғағым келеді.
Наталья Дмитриевна Қонаев қаласындағы А.Жұбанов атындағы № 5 орта мектепте орыс тілі пәнінің мұғалімі болып қызмет атқарады. Ұлты орыс болса да қазақ тілін білуге, мәдениетін құрметтеуге баса мән береді. Наталья Дмитриевнаның айтуынша, қазақ тілін меңгеру үшін ең алдымен ниет керек. Ол өзінің болашағын Қазақстанмен ғана байланыстырады және қазақ елінің азаматы екенін мақтан тұтады. Мемлекеттік тіл – қазақ тілі болғандықтан, оны Қазақстанның әрбір азаматы білуге тиіс деп есептейді. Наталья орыс мектебінде білім алғандықтан қазақ тілін мүлде білмеген. Алайда Халықаралық «Қазақ тілі» қоғамына мүше болып кіргеннен кейін қазақ тілін білуге қызығушылығы оянған.
Бүгінгі күні Наталья Батракова «Қазақ тілі» қоғамының lnstagram желісінде аптасына бір рет «Қазақша сөйлесейік!» тақырыбында сабақ өткізеді. Онда қазақ тілін оңай әрі тез үйренудің әдіс-тәсілдерін ұсынып жүр. Әйтсе де, Наталья «Білетінім – бір тоғыз, білмейтінім – тоқсан тоғыз» деп, өзі де осы сабақ арқылы мемлекеттік тілді тереңірек меңгеруде. Ол үнемі сөздік қорын байытып, білім көкжиегін кеңейтуге тырысады.
«Әуелде қазақ тіліндегі кейбір сөз тіркестерін дұрыс айту қиынға түсті, қазір ақырындап барлығын да үйреніп келе жатырмын. Мен мемлекеттік тілді өте жоғары деңгейде меңгергім келеді. Қазақ тіліндегі кітаптарды көп оқып, тілдің қыр-сырын үйренуге деген құлшынысымды арттырсам деймін», – дейді ол.
Тіл – ұлттың тірегі, ең асыл құндылығы. Тілге қамқор болу – ұлтқа қамқор болумен тең. Тілге құрмет – елге құрмет. Тілді өркендету – баршаның ісі!
Күлайша Бейсембаева,
Халықаралық «Қазақ тілі» қоғамы қоғамдық бірлестігінің
Алматы облыстық филиалы төрағасының орынбасары
