Қонаев қаласында облыстық Қазақстан халқы Ассамблеясы кеңесінің отырысы өтті. «Қазақстан халқы Ассамблеясының 30 жылдығы – бірлік пен келісім саясатының маңызды кезеңі» тақырыбындағы басқосуға ҚХА мүшелері, құрылымдық бөлімдер мен этномәдени бірлестіктердің төрағалары және облыстық мәслихаттағы «Достық» депутаттық тобының мүшелері қатысты.
Жиынды облыстық Қазақстан халқы Ассамблеясының төрағасы Марат Сұлтанғазиев ашып, 30 жыл ел бірлігі мен татулығын нығайтуға қызмет етіп келе жатқан қоғамдық-саяси ұйымның рөліне тоқталды.
Күн тәртібіндегі бірінші мәселе бойынша сөз алған «Элефтерия» Алматы облысының гректер қоғамы» қоғамдық бірлестігінің төрағасы Наталья Тифанциди облыстық Қазақстан халқы Ассамблеясы төрағасының қоғамдық негіздегі орынбасарлары лауазымына «Ронай» күрд этномәдени орталығының төрағасы Гамзе Гейдаров пен ҚХА жанындағы облыстық ақсақалдар кеңесінің төрағасы Амангелді Беспаевты ұсынды. Алматы облыстық әзербайжан этномәдени бірлестігінің төрағасы Асылы Осман сөз алып, Гамзе Бадриевичтің былтыр да осы қызметті абыроймен атқарғанын, сондықтан лауазымында қалдырылуын мақұл көретінін және 28 наурызда өткен ҚХА кеңесінің кеңейтілген отырысында этномәдени бірлестіктердің жұмысын күшейту мақсатында өңірлердегі қоғамдық орынбасарлардың санын көбейту көзделгендіктен тағы бір орынбасарлыққа Амангелді Дәнибекұлының кандидатурасын лайықты деп есептейтінін жеткізді. Кеңеске қатысушылар «Қазақстан халқы Ассамблеясы туралы» Заңына сәйкес өңірлік Ассамблея төрағасының қоғамдық орынбасарлары қызметіне ұсынылған кандидаттарды бірауыздан қолдап дауыс берді.
Күн тәртібіндегі екінші және үшінші сұрақтар бойынша сөз кезегі облыстық ішкі саясат басқармасының басшысы Ерік Абитовке берілді.
– Қазақстан халқы Ассамблеясы мен оның жанындағы құрылымдар жалпыұлттық маңызы бар жобаларды жемісті жүзеге асырып келеді. Былтыр мемлекеттік тіркеуден өткен барлық деңгейдегі этномәдени бірлестіктердің саны 29 болса, биыл 34-ке жетті. І тоқсанда аудандарда Қазақстан халқы Ассамблеясының 30 жылдығына және Алғыс айту күніне арналған «Корей еңбегі мен шабыт күні», грек, күрд мәдениетінің фестивальдары, украин этномәдени бірлестігінің «Жастық шағымыздың әндері» атты қайырымдылық концерті, «Татар қолөнері мен қонақжайлылық рухы» тақырыбында іс-шара ұйымдастырылса, Қонаев қаласында «Масленица» халықтық серуені және басқа да түрлі форматтағы шаралар өтті. «Мемлекеттік тіл – этносаралық қатынас тілі» жобасы аясында да шаралар өткізілді. Этнос өкілдерінің ең көп шоғырланған Еңбекшіқазақ, Іле, Талғар, Ұйғыр аудандарында этномедиация бойынша ауқымды жұмыс атқарылуда. Ақпараттық түсіндіру тобы Қарасай, Жамбыл, Талғар, Еңбекшіқазақ, Ұйғыр аудандарының тұрғындарымен кездесу өткізді. Этномәдени бірлестіктер, ақсақалдар және аналар кеңестері елеулі мәселелерді талқылаудың, сындарлы шешімдер қабылдаудың әмбебап диалог алаңына айналды. «Наурызнама» онкүндігінде «Жомарт жан» орталығы мен Ассамблея құрылымдарының ұйымдастыруымен 114 отбасына, 2365 адамға 20 млн теңгеден астам қайырымдылық көмек көрсетілді. 24 сәуірде Астана қаласында Қазақстан халқы Ассамблеясының ХХХIV сессиясы өтеді. Оған облыстан 50 адам қатысады деп жоспарлануда. Қазақстан халқы Ассамблеясының құрамына Алматы облысынан 13 жаңа мүше қабылданды, – деген басқарма басшысы Ассамблеяның 30 жылдығы тек ұйымның ғана емес, бүкіл елдің ортақ жетістігі екенін баса айтты.
Кеңес отырысын қорытындылаған Марат Елеусізұлы елдегі татулық пен бірліктің мызғымас тұғырына айналған бірегей құрылымның тәуелсіздігімізді нығайтуға, бейбітшілік пен қоғамдық келісім бағытындағы мемлекеттік саясаттың берік тірегі қызметін атқара беретініне сенім білдіре келе, Ассамблея мүшелеріне Қазақстан халқы Ассамблеясы куәлігі мен төсбелгісін және «Қазақстан халқы Ассамблеясына – 30 жыл» мерекелік медалін табыс етті.
Айжарық КӨПТІЛЕУОВ
