Өңірлік коммуникациялар қызметінің ақпарат алаңында өткен баспасөз мәслихатында «QonaevTV» телерадиокомпаниясы» ЖШС директоры Қымбат Хангельдина мен серіктестіктің бас продюсері Қымбат Досжан облыстық телеарнаның ашылатыны туралы мәлім етті. Жиынға облыстық ішкі саясат басқармасының басшысы Ерік Абитов қатысты.
Басқосуда өңірдің жеке облыс болып құрылғаннан бергі шешімін таппай келген төл телеарнасының ашылып жатқаны, оның таратылуының жай-жапсары, құрылымдық мәселелері турасында әңгіме қозғалып, қатысушылар тарапынан қойылған сауалдарға тұщымды жауаптар берілді.
Серіктестіктің басшысы Қымбат Хангельдина компания кеңсесінің әзірге Алматы қаласында орналасқанын, ғимарат мәселесі шешілген бойда облыс орталығына көшіп келетіндерін хабарлады. Сондай-ақ тілшілер қосынының да өз қызметін техникалық-коммуникативтік себептерге байланысты әзірше бас қаладан жүзеге асыратынын мәлімдеді. Өңірлік хабар таратудың сынақтық-тестілік нұсқасы мамыр айында іске қосылса, толықтай, бар қуатымен хабар таратуды қыркүйек айынан бастайтынын да байыппен жеткізді. Бұған қоса, қазіргі таңда журналистер мен техникалық қызметкерлерді іріктеу жұмыстары жүргізіліп жатқанын тілге тиек етті. Сонымен қатар телеарна хабарларының қандай платформалардан таратылатынына тоқталып, оның тек цифрлық эфирлік хабар тарату арқылы ғана емес, кабельдік және онлайн-сервистер арқылы да қолжетімді болатынын айтты.
Бас продюсер Қымбат Досжан өз кезегінде 12 сағаттық эфир барысында жаңалықтар, балаларға, жастарға, өңірдің белгілі тұлғаларына арналған бағдарламалар қамтылатынын атап өтті. Қоғамдағы өзекті мәселелер де тыс қалмайтынын айтып, қандай да бір істі ілгері жылжыту мақсатында сынға да кезек берілетінін жеткізді.
Облыстық ішкі саясат басқармасының басшысы Ерік Әзілжанұлы өңірлік телеарна кеңсесінің құрылысына және қызметкерлердің баспанамен қамтамасыз етілуіне қатысты қатысушылар тарапынан қойылған сұрақтарға егжей-тегжейлі жауап берді.
Бейбіт МЕКЕЕВ
