Алматы қаласындағы № 10 емхананың мейірбикесі Салтанат Бекбергенова жайында айтылатын жақсы пікірлер аз емес. «Рақмет саған, Салтанат!» – дейді емделушілер. Соның өзіме қатысты кейбір қырларына тоқталғым келді.
– Енді біздің емхананың тұрақты бақылауында боласыз. Мемлекеттік жүйе негізінде дәрі-дәрмекті тегін аласыз. Осыған қатысты кеңес беретін және оны реттейтін мейірбике қыздарымыз аз емес. Сіз №6 аумаққа қарайды екенсіз. Мұнда Салтанат Бекбергенова жұмыс істейді. Мейірбикеге тән ерекшеліктердің бәрі оның бойынан табылады», – деді эндокринолог дәрігер Мөлдір Жамалова. Мен осынау қысқа қайырымның өзінен көп жайды аңғардым.
Сонымен 112-ші бөлмеге бас сұқтым. Жылы жүзді инабатты қыз қазақы қалыппен сәлемдесіп, жатырқамай қарсы алды. Маған қатысты мәліметтердің бәрі компьютор экранынан оған көрініп тұр. Дәріханаға апаратын түбіртектерді дайындап қолыма ұстатты.
–Біз емделушіге қиындық туғызбауға тырысамыз. Сондықтан өзімізге жүктелген істі мұқият реттеуге күш саламыз. Егер сізге керек дәрі болмай қалған жағдайда, қаладағы әріптес емханалармен хабарласып, солардың есебінен түгендейміз. Уақыттан ұтылмағандарыңыз сізге де, бізге де жақсы, – деді жылы жымиып. Мейірбикенің түсінікті етіп жұмсақ үнмен жеткізген кеңесі жаныма дәріден кем әсер етпеді. Меніңше, өмірін адам емдеуге арнағандардың адал серті осындай болғаны керек қой!
Салтанаттың қабылдауына келетіндердің қарасы қашан да мол. Олардың арасында түрлі ұлт өкілдері бар. Бір кемеде кетіп бара жатқандай болған соң ба біз, емделушілер, бір-бірімізді жазбай танитын деңгейге жеттік. Кезек күтіп отырғанда өзара сөйлесіп қаламыз. Менің таңғалатыным, олардың Салтанат туралы ойлары бір-бірінен алшақ кетпейді. Бәрі мейірбикені қызындай жақсы көріп, жақынына балайды. “Марапаттың ең үлкені – адамдардың жүрек қалауымен айтылған ризалығы мен алғысы екен ғой”, – дедім іштей өзіндік толғаныспен.
Енді мынаған қараңыз, емделушілердің пікірі мен емхана басшылығының ұйғарымы үйлесім тапқан. Салтанат Бекбергенова портретінің «Құрмет тақтасына» ілінуі соның дәлелі. Мейірбике еңбегінің ұлықталуы мұнымен шектелмепті. Биылғы наурыздың басында «Пациент таңдауы» төсбелгісімен марапатталды.
Салтанат Қайратжанқызы 2001 жылы Алматы медучилищесін ойдағыдай бітіріп, дәрігерлік қызметтегі алғашқы жолын ауыз, құлақ, мұрынды емдейтін атақты № 5 ауруханада бастаған екен. Білімін шыңдауға, тәжірибесін жетілдіруге үнемі көңіл бөледі. Соның нәтижесінде әріптестер арасындағы беделі бұрынғыдан арта түскені анық. № 10 емханада еңбек еткеніне де он жылдың жүзі болыпты. 2019-2021 жылдары жоғарғы санаттағы білімге қол жеткізді. Өз ісінің майталманы атанған нағыз маман десек жарасып тұрғандай.
Түйіндеп айтқанда, Салтанаттың бүгінінен ертеңі биік. Өйткені көпшілік берген ақ бата мен алғыстың шапағаты ешқашан бекер кетпейді.
Батық Мәжитұлы,
Қазақстан Жазушылар одағының мүшесі
