Қала орталығында орналасқан «Ғалия» тігін ательесін талғарлықтардың бәрі дерлік жақсы біледі. Ширек ғасырдан бері жұмыс істеп келе жатқан бұл шағын кәсіптің иесі Ғалия Мамриева – білікті басшы ғана емес, сонымен бірге келушілерге жоғары деңгейде сапалы қызмет көрсетіп, киім тігетін тәжірибелі тігінші.
Біз келген кезде Ғалия Ақанқызы келушіден тапсырыс қабылдап жатты. Тігіншілікпен бала кезінен айналыса бастаған оның кәсіби шеберлігінде мін жоқ. Анасы да білікті тігінші болған. «Әке көрген оқ жонар, шеше көрген тон пішер» демекші, сол анасына еліктеп, кішкентайынан тігіншілік өнерге әуес болыпты. Оның қыр-сырын да жылдар бойы жалықпай, анасынан үйренеді.
Орта мектепті бітірген соң жеңіл өнеркәсіп бойынша технология институтына оқуға түсіп, тігіншілік ісінің білікті шебері болуды армандаған оның талайына тағдыр сол кезде атағы дүркіреп тұрған әйгілі «Нархозға» – Алматы халық шаруашылығы институтына түсіп, экономист мамандығын иеленуді жазыпты. Әрине, бұған бойжеткеннің ынта-ықыласы емес, үлкендердің ақыл-кеңесінің көбірек ықпал еткені сөзсіз. Оны бітірген соң жас мамандарды жұмысқа бөлу жолдамасымен Көкшетау қаласындағы автокомбинатқа жіберіледі. Бірақ «Туған жердей жер болмас, туған елдей ел болмас» демекші, қаймана қазақтың мәртебесі іспетті асқар Алатаудың баурайындағы табиғаты тамаша Талғарға деген сағыныш оған еш маза бермейді. Қалыптасқан тәртіпке сай, бөлінген жолдамамен жұмыс істеу мерзімі біткен соң өзі дүниеге келіп, бақытты балалық шағы өткен туған қаласына қайтып оралады. Бірақ мұнда келген соң жоғары білім алған экономист мамандығы бойынша жұмыс істемей, кішкентайынан анасынан үйренген тігіншілік кәсібімен айналысуға бел буады. Өйткені, бұл Кеңес одағы ыдырап, еліміз тәуелсіздіктің елең-алаңында көп қиындықты бастан кешіп жатқан кез еді. Сондықтан әркім де мамандық бойынша жұмыс істеуді емес, қайтсек табыс тауып, жан бағамыз, бала-шағаны асыраймыз дегенді көбірек ойлады. Ғалияны да өз кәсібін ашуға бірінші кезекте күнкөріс қамы итермелегені сөзсіз.
– Кәсіп бастау оңай болған жоқ, бастапқыда базарда мата саттым, сонымен бірге тапсырыс алып, үйде тігіншілікпен айналыстым. Тапсырыс күннен-күнге ұлғайған кезде кәсібімді кеңейту мәселесі туындады. Несие рәсімдеп, оған үш бөлмелі пәтер сатып алып, оны тігін ательесі ретінде жабдықтадым. Осылай менің жеке кәсіпкерлігім бірте-бірте қалыптаса бастады. Оған қоса өз қаржыма маталар дүкенін аштым. Алғашқы кезде бірнеше тігінші тек ер киімдерін тігетін, кейін қыз-келіншектерден тапсырыс көптеп түсе бастады, – дейді Ғалия.
Қазіргі кезде ол бастаған бизнес аяғына нық тұрып, ширек ғасыр ішінде аудандағы кәсіби де білікті тігін мекемесіне айналды. Талғарлықтардың бұл жерде тапсырыспен пальто немесе көйлек тіктірмегені кемде-кем деуге болады. Сол себепті де оның даңқы алысқа кетіп, бұл ателье көпшіліктің, әсіресе қаланың зиялы қауымының көбірек келетін орнына айналды. Ал тұрақты тапсырыс берушілер тігіншілердің шеберлігіне тәнті екендіктерін айтып, алғыстарын білдіруде.
Ғалия Ақанқызының айтуынша, қазір ательедегі 10 тігінші күніне – 20, ал айына 300 данаға дейін ішкі және сыртқы әртүрлі киім үлгісін тігеді. Құрал-жабдықтардың бәрі шетелде жасалған және өте сапалы, ал маталар Түркиядан жеткізіледі. Ательенің жанында қызы Каринаның «Студия-27» деп аталатын брендті өнімдер дүкені орналасқан. Бұл жерде әртүрлі пальто, әдемі көйлектер сатып алуға болады. Карина да тігіншілік кәсібімен, бірақ анағұрлым заманауи деңгейдегі бизнеспен айналысады.
– Қызым да менің жолыммен келе жатыр, оның болмысы шығармашылыққа жақын. Т.Жүргенов атындағы Өнер академиясын өнертанушы мамандығы бойынша бітіріп, Италияда сән бизнесі бойынша тағылымдамадан өтті. Қызы мен анасы бизнесте бірге болса, оны дамыту қиынға соқпайды. Ол тек көмекшім ғана емес, сонымен бірге менің идеялық тұрғыда шабыттандырушым, – дейді ол туралы мақтана әңгімелеген анасы.
Айтса айтқандай, оның қолынан шыққан өнімдер талай халықаралық байқауларда жоғары баға алыпты. Анасы мен қызы тізе қоса жұмыс істей жүріп, өз ательесін шағын өндіріске айналдырған. Мұны бұл жерге тапсырыс берушілер мен дайын өнім үлгілерін сатып алатын тұтынушылардың тамаша пікірлері толық айғақтайды. Оның да өзіндік себебі бар, өйткені ателье ең үздік және заманауи тігу мекемесінің туын жоғары ұстап тұр. Ғалияның айтуынша, оның қолынан көптеген жас тігіншілер өткен, олардың біразы уақыт өте келе өз ісінің нағыз маманы болып, жеке кәсіптерін ашқан.
– Бүгінгі күні бүкіл еліміз көлемінде тапсырыс көп, біздің өнімдеріміз Қазақстанның барлық қаласында сатылады. Сұраныстың көптігі соншалық, енді бизнесті кеңейтіп, жаңа оффлайн-тігу бұйымдары дүкенін ашу керек болып тұр. Қазір кәсіп ашудың еш қиындығы жоқ, тек оны нарықты зерттей отырып, тиянақты жүргізе білу керек. Мемлекет те шағын және орта бизнесті дамытуға барлық жағдайды жасап, әсіресе кәсіпті жаңа бастап жатқан жастарға барынша қолдау көрсетіп келеді. Тек Президентіміз Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында атап көрсеткендей, әр кәсіпкер қолдаудың қандай түрі бар екенін және оған қалай қол жеткізе алатынын еш қиындықсыз біліп отыруы қажет. Сонда шағын бизнес орта бизнес санатына өтуге мүдделі болып, жалпы кәсіпкерлік дами түседі. Өз кезегінде бұл отандық экономиканың өркендеуіне, халықтың табысы артып, тұрмыс деңгейінің жақсаруына әсер ететін болады, – дейді тәжірибелі тігінші Ғалия Ақанқызы.
Талғар ауданы
