Әр халықтың өзіндік мәдениеті мен салт-дәстүрін айшықтайтын ерекше белгілерінің бірі – ұлттық киім. Ұлттық киім тек сыртқы көрінісі ғана емес, ол сол ұлттың рухани болмысын, дүниетанымын, өмір салтын көрсететін құнды мұра.
Еңбекшіқазақ ауданы Малыбай ауылындағы орта мектепте «Наурызнама» аясында «Ұлттық киім – ұлт мұрасы» атты этнофестиваль өтті. Аталған шараға Еңбекшіқазақ аудандық білім бөлімінің бас маманы Зарина Бөлекбаева, Малыбай ауылының тумасы, «Мырза» брендінің негізін қалаушы жас кәсіпкер Мырза Махамбет, киноактер Айқын Қалықов қатысты. Сонымен қатар ардагер-ұстаздар Биға Энова, Райхан Майлыбекова, ауыл ақсақалдары Некебай Құрманбаев, Қанат Жасымбеков, Нұрбосын Бөбетаев, Әділбек Қаба игі шараның ұйытқысы болды.
“Әз-Наурыз – ай бойы тойланатын тағылымы мол мереке. Ел басшысы Қ. Тоқаев “Наурызнама” онкүндігін жариялап, Ұлыс мерекесінің аясын кеңейтті. Ауылымызда өтіп отырған бұл шараның мақсаты да сол, Президент бастамасына қолдау танытып, жас ұрпақты ұлттық құндылықтарды қадірлеуге шақыру. Елімізді, жерімізді сүю, дәстүрімізді дәріптеу біздің ішкі әлемімізбен бірге сыртқы келбетімізден де ұлттық киім арқылы айқын көрініп тұруы керек”, – дейді этнофестиваль ұйымдастырушысы, “Малыбай орта мектебі” КММ директоры Ақпейіл Өскенбаева.
Фестивальға еңкейген кәріден, еңбектеген балаға дейін ұлттық киім киіп келді. Бала тәрбиесіне әкелердің белсенді араласуын қамтамасыз ету үшін әкелер клубы, салт-дәстүрді жас ұрпаққа өнегелейтін әжелер клубы, аналар мен жеңгелер клубы жиналған көпшілікке отбасылық құндылықтарды паш етті. Сонымен қатар халқымыздың мәдениеті мен тарихының айнасы болған киіз басу, кесте тігу, қамшы өру, ою-өрнек салу сынды ұлттық қолөнер бұйымдары да көрініс тапты. Одан басқа мектеп оқушылары қазақтың ұлттық билері «Қаражорға», «Қамшы» және «Қамажайды», сондай-ақ өзбек, ұйғыр халықтарының билерін орындап, сахна сәнін асырды. Шара соңында қонақтарды киіз үйдің төріне шығарып, ақ дастарқанға жайғастырды.
Бұл фестиваль төл мәдениетімізді дәріптеген маңызы зор іс-шара болды. Ұлттық киімге құрметпен қарап, оны күнделікті өмірде қолдану – өз тамырымызды тереңірек тану мен ұлттық санамызды нығайтудың бір жолы.
Жайна Ептібекқызы
Малыбай ауылы,
Еңбекшіқазақ ауданы
