Қазақстан мен Қырғызстан шекарасында «Қарқара-Кеген» өткізу бекеті бар. Мұнымен қоса, өңірде «Қарқара», «Рабат» және «Саты» шекара бекеттерінің шекарашылары ел тыныштығын күзетіп тұр. «Қарқара-Кеген» өткізу бекетінен жолаушылар, көлік, тауар және жануарларды өткізеді. Бекет Ыстықкөл облысының Түп ауданында орналасқан.
ҚР ҰҚК Шекара қызметінің Алматы облысы бойынша департаменті, Райымбек ауданы бойынша шекара басқармасының «Қарқара-Кеген» шекаралық бақылау бөлімшесі 2001 жылдан бері қырағы көзді шекарашылардың бақылауында. Ел тыныштығын күзеткен шекарашылардың арқасында «Қарқара-Кеген» өткізу пунктінен Қазақстан Республикасының азаматы А.Оразбай мемлекеттік шекарадан өту барысында оқ-дәрімен ұсталды. Оқиға шекара нарядының қызметі барысында анықталды. Қазақстан Республикасының мемлекеттік шекарасы арқылы оқ-дәрілерді рұқсат құжаттарсыз өткізуге болмайды. Бұл азамат ҚР заңнамасын бұзған болып саналады.
Шекара бақылау бөлімшесінің бастығы, капитан Дастан Өмірзақовтың басшылығымен оқиғаның мән-жайы анықталып, құқықтық рәсімдеу жұмысы жүргізілді. Заңды бұзған азамат Кеген аудандық ішкі істер бөлімінің қызметкерлеріне тапсырылды. Осы орайда ҚР Шекара қызметі азаматтарды мемлекеттік шекарадан өтуде тәртіп ережелерін қатаң сақтауға шақырады. Қазақстан Республикасының заңнамасына сәйкес, өткізу пункті режимін бұзу әкімшілік және қылмыстық жауапкершілікке әкеліп соғады.
Дәурен ӘБУТӘЛІПОВ
Кеген ауданы
