Қонаев қаласында жергілікті тұрғындар, жастар, белсенділер мен қоғамдық ұйым өкілдерінің қатысуымен «Таза жағажай» экологиялық акциясы ұйымдастырылды.
Акция барысында қатысушыларға қоршаған ортаны қорғаудың маңыздылығы туралы ақпарат беріліп, экологиялық тәрбие жұмысы жүргізілді. Жалпы, аталмыш шараға 200-ден астам адам белсене қатысып, жағажайды тұрмыстық қалдықтардан, пластик бөтелкелерден, қағаздардан және басқа да қоқыстардан тазартты. Нәтижесінде 3 тоннадан астам қоқыс жиналды.
Шараға қатысушылардың айтуынша, акция жағажай аумағын тазарту, су айдындарының ластануының алдын алу және қоршаған ортаны қорғауға қоғам назарын аудару мақсатында ұйымдастырылған.
– Табиғатты таза ұстау және болашақ ұрпаққа мұра ету маңызды. Меніңше, қоршаған ортаны аялау – әрбір азаматтың негізгі борышына айналуы тиіс. Осы орайда барша тұрғындар мұндай шараға белсенді түрде атсалысу қажет екенін айтқым келеді, – деді қалалық ардагерлер ұйымының төрағасы Базарбай Оралбаев.
Жағажай аумағы мен қала тазалығын қамтамасыз ететін акция алдағы уақытта да жалғасын таппақ.
Ерзат АСЫЛ
Қонаев қаласы
