SDU университеті – Алматы облысында көш бастап тұрған жетекші оқу орны. Мұнда бүгінгі таңда 9 мыңға жуық студент білім алады. Озық ойлы жастар аталмыш университеттің қабырғасынан түлеп ұшып, ел мерейін асқақтатып жүр. Жыл сайын абитуриенттер саны артып, оқу бағдарламасы жаңаша, заман талабына сай артып келеді. Енді алдағы уақытта жасанды интеллектің қыр-сырын үйрету қолға алынуда. Оған айқын дәлел ретінде жақында салтанатты түрде жаңа оқу блогының ашылғанын айтуға болады. Оның іргетасы осыдан бір жыл бұрын облыс әкімі Марат Сұлтанғазиевтің қатысуымен қаланған болатын. Ал өткен аптада бұл ғимарат толығымен қолданысқа берілді.
Аталған жобаға «Freedom Holding Corp.» компаниясы қаржылай қолдау білдіргендіктен, ынтымақтастықты арттыру мақсатында жаңа оқу корпусы SDU & Freedom жасанды интеллект блок ретінде қолданысқа берілді. Оқу ордасының ішіндегі ерекше ғимараттың ашылуына ҚР Ғылым және жоғары білім министрі Саясат Нұрбек, «Freedom Holding Corp.» компаниясының бас атқарушы директоры Тимур Турлов, Алматы облысы әкімінің бірінші орынбасары Нұрлан Әбдірахым, «Қазақтелеком» компаниясының басқарма төрағасы Бағдат Мусин, «Сергек» камерасын ойлап тапқандардың бірі Әсет Ахметов сынды университеттің танымал түлектері және Қарасай ауданы әкімінің орынбасары Адис Сейдакматов қатысты.
Шараға қатысушылар алдымен университет ұйымдастырған көрмені тамашалады. Мұнда оқу ордасында білім алатын өнертапқыштардың жетістіктері таныстырылды.
Алғысөзді оқу ордасының ректоры Әлімжан Игенбаев алып, университеттің инфрақұрылым жағынан дамуына жан-жақты қолдау білдіріп келе жатқан облыс әкімдігіне, сондай-ақ жаңа оқу корпусының ашылуына мұрындық болған «Freedom Holding Corp.» компаниясының бас атқарушы директоры Тимур Турловқа ризашылығын білдірді.
ҚР Ғылым және жоғары білім министрі Саясат Нұрбек өз сөзінде «Білімге салынған инвестиция үлкен табыс әкеледі» деген америкалық философ Б.Франклиннің сөзін тілге тиек етіп, жасанды интеллект жобасына қаржылай қолдау білдірген Тимур Русланұлына алғысын жеткізді. Сондай-ақ бұл бастаманың болашағы зор екенін айтты.
«Жасанды интеллект блогының құрылуы – еліміздің зияткерлік әлеуетін қалыптастырудағы маңызды қадамдардың бірі және бұл SDU үшін үлкен жетістік. Бұл жоба студенттер мен зерттеушілерге болашақ технологияларын терең зерттеу және қолдану үшін жаңа мүмкіндік ашады. Мемлекет ғылым мен білімді дамытуға бағытталған бастамаларды қолдайды және біз SDU университеті цифрлық технологиялар саласында Қазақстанды алдыңғы қатарға шығаратын мамандарды даярлайтын басты алаңдардың біріне айналады деп сенеміз. Мұнда жаңашыл идеялар мен инновациялық жобалар туындайтынына күмәнім жоқ. Бүгінгі таңда жасанды интеллект үлкен корпорациялар мен ұлттық стратегиялардың деңгейінде қолданылып келеді. Бірақ бизнес саласы оның қуатын әлі сезген жоқ. Сондықтан бұл жақсы бастама деп білемін. Жалпы SDU педагогика, ақпараттық технология, киберқауіпсіздік бағытында алда келе жатқан оқу ордаларының бірі болғандықтан, «Freedom Holding Corp.» компаниясының инвестициясы өз жемісін береді деген ойдамын. Өйткені алдағы уақытта аталмыш корпорация өз әлеуетін цифрлық технология тұрғысында дамытуға мүмкіндік алып отыр. Сол себепті бұл екіжақты біріктіретін өте жақсы синэнергия», – деді министр Саясат Нұрбек.
Ал жобаға қаржылай қолдау білдірген Тимур Турлов бұл инфрақұрылымға емес, ертең әлемді өзгертетін жас таланттарға салынған инвестиция екенін атап өтті.
Жасанды интеллекттің дамуына көп көңіл бөлетін SDU университетінің бұл бастамасына облыс әкімінің бірінші орынбасары Нұрлан Ерғалиұлы да ризашылық білдіріп, оқу ордасының облыс аумағында орналасқанына қуанышты екенін айтты. Сондай-ақ ол жаңа оқу блогының ашылуы заманауи тренд емес, болашақты көрегендікпен жоспарлау, алға биік межелер қою деп түсінетінін жеткізіп, университет ұжымына тың белестерді бағындыруына тілектес екенін білдірді.
SDU-дың қабырғасынан түлеп ұшқан түлектер бүгінгі таңда оның мақтанышына айналған. Солардың бірі – «Қазақтелеком» компаниясының басқарма төрағасы Бағдат Мусин. Ол да айтулы салтанатты кеште құрметті қонақтардың қатарынан табылып, кезінде өзі білім алған оқу ордасындағы тәлімгерлеріне, жалпы университет ұжымына алғысын айтты. Сондай-ақ жасанды интеллект блогының ашылуы үлкен жетістік екеніне тоқталып, оның мүмкіндіктерін түсіндірді.
Бүгінгі таңда университет қабырғасында былтыр ҰБТ-дан максималды 140 балл жинаған Жаннұр Еңсебек пен Айнұр Ержанова сияқты студенттер білім алатынын айта кету керек. SDU-дың бетке ұстары ретінде олар да бұл шарада бой көрсетіп, оқу ордасында жан-жақты дамуға мүмкіндік көп екенін айтып, осында оқып жатқандарын мақтан тұтты. Қос білімгер де жасанды интеллект блогының ашылуы өздерінің де, замандастарының да білім көкжиегін кеңейтуге жол ашатынын сөз етті.
SDU ректоры Әлімжан Игенбаевтың айтуынша, университет IT, инженерия, педагогика, құқық, әлеуметтік ғылымдар және бизнес салаларында сұранысқа ие мамандар даярлап келеді. Осы орайда халықаралық серіктестермен, академиялық институттармен және бизнес қауымдастығымен ынтымақтастық орнатқан.
«Бүгінгі ашылып отырған блок студенттердің әлеуетін арттырып, олардың стартаптарын жүзеге асыруға мүмкіндік беретініне сенеміз. Бұл жаңа нысан – өңіріміздегі білім мен ғылым саласын дамытудағы үлкен қадам», – деді университет ректоры.
Жаңа блоктың лента қию рәсімінен кейін қонақтар оқу корпусының ішін аралап, жасанды интеллект технологияларын дамытуға арналған зертханалар мен қаржылық сауаттылықты артыруға бағытталған шағын орталықтардың мүмкіндіктерімен танысты.
Айта кетейік, SDU қабырғасындағы жаңа оқу блогы «Freedom Holding Corp.» компаниясының «Freedom Шапағат» қайырымдылық қорының демеушілігімен салынды. Жалпы аумағы – 5,6 мың шаршы метр. Мұнда жасанды интеллект технологияларын дамытуға және қаржылық сауаттылықты арттыруға арналған зертханалар орналасқан. Сондай-ақ интерактивті орталықтар құрылып, студенттер қауымы Freedom Academy сарапшыларынан инвестициялау және трейдингтің негізгі қағидаларын үйрене алады. Жаңа ғимарат түрлі бағыттағы тақырыптық іс-шаралар, конференциялар мен семинарлар өткізуге мүмкіндік береді. Мұнда тек сапалы білім алуға ғана емес, сондай-ақ жайлы демалыс аймақтарын құруға да жағдай жасалған.
Дидар МӘЛІКҰЛЫ
Қарасай ауданы
