Түркістан қаласында педагогикадағы дәстүр мен инновацияны ұштастырған халықаралық жиын өтті. Білім мазмұнын дамыту институты ұйымдастырған шараға Алматы, Семей, Балқаш, Астана қалалары, Павлодар, Атырау, Түркістан облыстары, сондай-ақ Қырғызстан мен Моңғолиядан жүзге жуық ұстаз қатысты.
Педагогика ғылымдарының докторы, профессор Нұрша Оразахынованың авторлығындағы «Сатылай кешенді оқыту технологиясының рөлі» тақырыбында өткен ІІ халықаралық саммиттің басты мақсаты – Алаш зиялысы Жүсіпбек Аймауытұлының білім саласындағы құнды мұраларын қазіргі білім жүйесімен үйлестіре отырып, «Сатылай кешенді оқыту» технологиясының функционалдық сауаттылықты арттырудағы тиімді жолдарын айқындау болды.
Шараның екінші күнінде «Сатылай кешенді оқыту» технологиясы шығармашылық ұжымының білім саласын жетілдірудегі іс-тәжірибесін насихаттау мақсатында «Тілім менің – тірлігімнің айғағы» атты ауызша командалық олимпиада өтті. Жалпы саны 106 оқушы мен 57 жетекші қатысқан білім сайысына 12 адамнан құралған қазылар алқасы төрелік етті. Қатысушылардың қазақ тілі мен әдебиеті пәндері бойынша теориялық білімі, шапшаңдығы мен тапқырлығы сынға түсті.
Сайыс қорытындысы бойынша, жүзден жүйрік шыққандар жүлдегер атанды. Солардың қатарында Кеген ауданы Ақтасты орта мектебінің 5-сынып оқушысы Кеңесжан Аңсар да бар. Ол жүлделі ІІ орынға ие болды. Жетекшісі – Қымбат Қамбарбекова. Осы саммитке аудан атынан қатысқан мұғалімдер – Қымбат Тоғызбайқызы, Сәуле Кенбаева, Гүлзия Маратқызы шығармашылық байланыс орнатып, тәжірибе бөліскені үшін ұйымдастырушылардың Алғыс хаттарымен марапатталды.
Бұл шара оқушылардың қазақ тіліне деген құрметін арттырып, ұлттық құндылықтарды дәріптеуге бағытталған маңызды қадам екені анық. Осындай игі істер көп атқарылса, ана тіліміздің мәртебесі бұдан да асқақтай түсетіні сөзсіз.
Дәурен ӘБУТӘЛІПОВ
Кеген ауданы
