Жамбыл ауданы Қарақыстақ ауылындағы Сүйінбай Аронұлының әдеби-мемориалды музейінде ақынның 210 жылдығына арналған шара өтті. Оған ауданға қарасты мектептердің тарих пәні мұғалімдері, ауылдық Мәдениет үйі мен кітапхана қызметкерлері қатысты.
Тарихшы-ұстаздар Сүйінбай Аронұлының өмірі мен шығармашылығы туралы баяндама жасап, жас өнерпаздар ел арасына кең таралған айтыстарынан үзінді орындады. Шығыс Қазақстан облысынан келген тарих пәні мұғалімі Жадыра Оралбекқызы өз сөзінде Сүйінбай музейінен алған әсерімен бөлісіп, бұл мұражайды ғасырлар қойнауынан сыр шертетін асыл мұралар мекені деп бағалады. Сонымен қатар Сүйінбай Аронұлының шөпшегі Үсен Дайрабаев өзінің естелігімен бөлісті. Шараға қатысушылар ауыл сыртындағы ақын кесенесіне барып, рухына тағзым етті.
Шиен ауылдық кітапханасында да арқалы ақынның мерейтойына арналған іс-шара өтті. «Ел тарихындағы елеулі тұлға» атты әдеби-танымдық кешке осындағы орта мектептің қазақ тілі мен әдебиеті пәні мұғалімдері мен кітапқұмар жастар қатысты. Мұнда келушілер назарына «Менің пірім – Сүйінбай» атты кітап көрмесі ұсынылды.
Бұл шаралар ұлтымыздың ұлы перзенттерінің бірі – Сүйінбай бабамыздың есімін ұлықтап, баға жетпес мұрасын жаңғыртуға арналды. Ол – өзінің өлең-толғауларымен, сұңғыла айтыскерлігімен ұлттық жырымызды биікке көтерген ұлы тұлға. Даңқы Алатаудан асып, бүкіл қазақ даласына жеткен. Бір өзі бір ғасырдың жоғын жоқтап, мұңын мұңдап өткен көркем шежіре. Ақын шығармалары – еліміздің асыл қазынасы. Жыр дүлдүлінің артына қалдырған өшпес мұрасы – бүгінгі ұрпаққа өнеге болып қалары сөзсіз.
Баян БИКТАСОВА,
Шиен ауылдық кітапханасының қызметкері
Жамбыл ауданы
