Бұл туралы «AMANAT» партиясы Алматы облыстық филиалы жанындағы білім беру және денсаулық сақтау мәселелері жөніндегі кеңесте талқыланды.
«Ауылдағы медицина мен мектептердің жағдайын жақсарту – біз үшін басты міндет. Биыл облыс бойынша 39 мектепке жөндеу жүргізіледі. Соның ішінде 7 мектеп ерекше бақылауға алынған», – дейді облыстық білім басқармасының басшысы Салтанат Беспаева.
Оның айтуынша, Ащыбұлақ ауылындағы А.Бубенцов атындағы мектепке 978 млн теңге бөлініп, жөндеу жұмыстары аяқталған. Ал Ұзынағаштағы Ш.Уәлиханов атындағы мектептің жөндеу жобасы 1,6 млрд теңгеге бағаланып, соның 1 млрд бөлініп, құрылыс басталып кеткен.
Дегенмен кейбір мәселелер де бар. Ащыбұлақ ауылындағы жаңа мектептің құрылысы тоқтап тұр. Ата-аналар жаңа оқу жылында балалар қайтадан мектепсіз қалама деп алаңдап отыр.
«Денсаулық сақтау саласында да 8 нысан жөнделіп жатыр. Ұйғыр ауданындағы Тасқарасу амбулаториясына 250 млн, Қонаев қаласындағы Шеңгелді амбулаториясына 584 млн теңге бөлініп, екеуінің де жөндеуі аяқталған», – дейді облыстық денсаулық сақтау басқармасы басшысының орынбасары Эльмира Иманғалиева.
Сондай-ақ Есік қаласындағы аурухана ғимаратына 6,88 млрд теңге қарастырылған, қазіргі таңда жөндеу жұмыстары жүріп жатыр. Ал Қаскелең қаласындағы балалар ауруханасында су мәселесі мен санитарлық жағдайға қатысты тұрғындардан шағымдар түскен. Бұл жерге жоба дайын болса да, қаржы бөлінбей отыр.
Айта кету керек, кеңесте көтерілген мәселелердің барлығы ұсыныстар хаттамаға енгізіліп, бақылауға алынатын болды.
