Жуырда бұқаралық ақпарат құралдарында, әлеуметтік желілерде Қонаев қаласының тұрғындарының саны азая түскені туралы ақпарат тарады. Ол мәліметке жүгінсек, соңғы бір жылда облыс орталығы халқының саны 8,2 пайызға азайып, демек, 65900 адамға кеміген. Алайда, ақпарат таратушы Data Hub тілшілері бұл құбылыстың нақты себебін түсіндіре алмаған. Осыған байланысты Қонаев қаласының әкімдігі мәлімдеме жасады.
«Баршаға мәлім, 2024 жылдың 9 қаңтарында Алатау қаласы құрылды. Оған Қонаев қаласы аумағындағы Заречный, Арна ауылдары толығымен енгізілді. Сәйкесінше, қала халқының саны азайды. 2023 жылы Қонаев тұрғындарының саны 70512 болса, 2024 жылы бұл көрсеткіш 65024-ке төмендеген. Алайда, халық саны қайта өсіп келе жатыр, қазіргі көрсеткіш 65934-ті құрап отыр. Осы себептен, халық арасында «Облыс орталығы өмір сүруге қолайсыз қала» деген жаңсақ пікір тудырмауларыңызды сұраймыз», – деп жазды әкімдік.
Жалпы облыс орталығы мәртебесін алғалы Қонаев қаласына Талдықорғаннан қоныс аударған қызметкерлер баршылық. Сонымен қатар облыстық деңгейдегі департамент, басқармалардың осында ауысуына, жаңадан жұмыс орындарының ашылуына, құрылыстың қарқынды жүруіне орай Алматыдан да қатынап, жұмыс істеп жатқандардың қатары көп. Мұның өзі жаңа келбетке еніп, жаңара түскен Қонаев қаласының болашағы зор екенін көрсетеді. Алдағы уақытта Алматы қаласындағы бірқатар оқу орындарын Қонаевқа көшіріп, филиалдарын ашу да жоспарда бар. Мұнымен қоса, қала қарқынды дамып, туристік нысан болып табылатын Қапшағай су қоймасының жағалауы жасалып, жаңа келбетке енуде. Демек, демалушылар үшін бүгінгі таңда барлық жағдай жасалуда. Осы тұрғыдан алғанда да шаһардың даму әлеуеті зор.
Қонаев қаласының бүгінгі беталысы қандай? Облыс орталығы мәртебесін алғалы өзгерістер орын алуда ма? Бұл турасында тұрғындардан сұрап көрген едік.
Сергей Горяной, қалалық қоғамдық кеңес төрағасы:
«Қонаев қаласы облыс орталығы атанғалы бойына қан жүгіріп, жан біткендей. Күнде түрлі мәдени, спорттық шаралар өтіп жатады. Оның ішінде жазғы және қыстық дрифт шоу, Оушенмэн, марафон, жарыстар бар. Осының өзі-ақ қала тіршілігіне ерекше өзгеріс енгенін көрсетеді. Тұрғындардың демалуына қолайлы орта жасалып, денешынықтырушылардың саны артқан. Оның дәлелі – Кроссфит алаңы мен жаңа жағажайлар. Шомылу маусымына дайындық қызу жүріп жатыр. Инвестициялық жобалар да жүзеге асуда. Тұрғын үйлердің құрылысы қарқын алды. Тізбектеп айта берсек, көп әрине. Халық саны азайды деп айта салу – оңай. Ел ішінде не болып жатқанына аса мән беру қажет», – деді ол.
Бұл орайда «PARYZ ЕРІКТІЛЕРІ» жастар қоғамдық бірлестігінің төрағасы Әділет Айтқазы да өз ойын білдірді.
«Қонаев қаласының тұрғындары әрқашан бірлесе қызмет етеді. Оны азаматтық ұстанымдарынан аңғаруға болады. Қаладағы мәселелерді көтеріп, оның шешілуіне бір кісідей атсалысады. Халық саны маңызды шығар, алайда, оның күнделікті тіршілігі одан да маңыздырақ. Бас жоспар бойынша тұрғындар саны 200 мың болады деп жоспарланған. Қазірдің өзінде 65 мыңнан асып тұрсақ, бұл межеге тез арада жетеміз. Жоспарда анықталғандай, «Жаңа Іле» аумағы игеріліп, Академиялық қалашық салынса, қоныстанушылардың саны артып, шаһар дамиды. Қазірдің өзінде даму қарқыны жаман емес. Бір сөзбен айтсақ, Қонаев – болашақтың қаласы», – деді ол.
Міне, байқап отырғандарыңыздай, Қонаев қаласында қайнаған тіршілік орын алуда. Шаһар тұрғындарының алдағы күннен үміті зор. Өйткені, Қапшағай көлінің жағалауындағы әсем қала күн санап көріктене түсуде.
Алма ЕСЕНБАЙ
