Биылғы Ант қабылдау рәсімі бүкіл ел болып ұлықтап жатқан Ұлы Жеңістің 80 жылдығымен қатар келіп отыр. Сол себепті де көктем айында шекарашылар сапына алынған жас сарбаздар үшін бүгінгі шараның маңызы зор.
ҰҚК Шекара қызметі Алматы облысы бойынша департаментінің оқу базасында өткен рәсімде 500-ге тарта жас сарбаз Отанына адал қызмет етуге салтанатты түрде серт берді. «Сарбаз болдым, мінеки» демекші, осы сәттен бастап, Отан қорғаушылардың қатарына қосылған жас сарбаздардың жас ғұмырларындағы ең бір сәулелі сәтке куә болу үшін алыстан ата-ана, туған-туыстары мен достары келді. Атап айтарлығы, алаңда сап түзеген жас сарбаздар әскерге республикамыздың барлық өңірлерінен алынған.
Сонымен қатар, шараға «Генералдар кеңесі» республикалық қоғамдық бірлестігі Президиумының төрағасы отставкадағы генерал-лейтенант Бексұлтан Сәрсеков, Шекара қызметінің сардары, әскери ғылымдарының докторы, профессор, Қазақстан Республикасы Әскери ғылымдары академиясының академигі, отставкадағы генерал-майор Шынтас Өтепов және Наурызбай ауданының құзырлы органдарының өкілдері қатысты.
Еліміздің Әнұраны орындалған соң кезек Ант қабылдау рәсіміне берілді. Сарбаздардың біркелкі жүрістері мен қимыл-қозғалыстарына қарап, өздерінің әскери тәртіпке төселіп, темірдей қатал өміріне қалыптасып үлгергенін байқауға болады.
Сарбаздар департамент бастығы полковник Әлібек Амангелдіұлы Каюпов бастаған лауазымды тұлғалар мен аға буын сардарлардың алдында ант берді.
Бұдан әрі рәсімнің негізгі бөлімі – нағыз шекарашыға айналған сарбаздарды құттықтауға кезек берілген. Шара қонақтары Отан қалқандарының алдағы қызметтеріне сәттілік тіледі.
Шара үстінде департамент бастығы полковник Әлібек Каюпов көпшілік алдына «Срочник 2.0» бағдарламасын жеңіп алған «Көктем-2024» шақырылымының жеті сарбазына сертификат тапсырып, Отан алдындағы қызметтеріне алғыс білдірді. Айту керек, сертификаттар – сарбаздардың өздері қалаған жоғары оқу орындарына берілетін зор мүмкіндік.
Шекарашылардың кез келген шарасын департаменттің сайыпқырандарысыз елестету мүмкін емес. Олар жиналған қауымға қоян-қолтық ұрыспен бірге шекара бұзушыны құрықтаудың әдіс-тәсілдерін шебер көрсетті. Сондай-ақ, ҰҚК Шекара қызметі Қызметтік кинологя басқармасының кинологтары ортаға ұлтымыздың брендіне айналып үлгерген тазы, төбетпен шығып, олардың өнерін паш етті. Тағы сарбаздардың ата-ана, бауырлары мен достары алдарынан сап түзеп өткен атбегілер мен олардың қызмет аттарының өнерін тамашалды
Жиыннан кейін департаменттің жауапты тұлғалары ата-аналармен кездесіп, көпшілікті толғандырған сауалдарға тұщымды жауап берді.
Тамара ДӘУЛЕТБАЕВА,
ҰҚК Шекара қызметінің запастағы подполковнигі
