Әл-Фараби атындағы Қазақ ұлттық университетінде Тұрақты даму бойынша ЮНЕСКО кафедрасы «Қоршаған ортаны қорғау және өмір тіршілігінің қауіпсіздігі» мамандығының 1-курс магистранттары мен педпрактика жетекшісінің ұйымдастыруымен Еңбекті қорғау күніне орайластырылып, гибрид форматында халықаралық дөңгелек үстел өтті.
Іс-шараға оқытушылар, студенттер мен әр саладан қонақтар қатысты. Басқосуда Д.Қонаев атындағы Тау-кен институтының ғылыми жұмыс жөніндегі директордың орынбасары Евгений Шабельников , ғылыми хатшы Әсия Бояндинова, өндірістік қауіпсіздік бөлімінің басшысы Артем Колотаев, «Әл-Фараби атындағы Қазақ ұлттық университеті» КЕАҚ азаматтық қорғаныс, еңбекті қорғау басшысы Арман Маймақов, бас маман Амантай Мұхаметкәрімов, шетелдіктерден Гаити университетінің профессоры О. Гамус бастаған ғалымдар, сарапшылар баяндама жасап, іс-шараның өндіріс орындарында адамдардың қауіпсіздігін қамтамасыз ету мамандықтарын таңдаған студенттер мен магистранттар үшін маңыздылығын атап өтті. Е. Шабельников, А. Колотаев сияқты ғалымдар өндірістік қауіпсіздікті жетілдіру мақсатында жасалып жатқан ғылыми жобалары туралы маңызды ақпараттарымен бөлісті.
Шараны ұйымдастырушы магистранттар Әнуар Серіков, Ақерке Қойлыбаева, Дәулет Мыңжасов, Назгүл Өтепова, Жансая Нұрбекова, Жігер Зиағаділ және Айжан Жұмабекова іс-шараны қазақ, орыс, ағылшын тілдерінде жүргізіп отырды.
Дөңгелек үстелдің екінші бөлімінде осы сала бойынша біліммен сусындап жатқан жас мамандардың қауіпсіздік мәселесіне деген қызығушылығын арттыру мақсатында қызықты ойындар әзірленді. Студенттердің білімі сыналып, шыңдалып, бәсекеге төтеп бере білгендер жүлдеге ие болды. Жеңімпаздарға арнайы сыйлықтар, сертификаттар табыс етілді.
Шараның тартымдылығы сол – жас ұрпақтың мамандыққа деген қызығушылығын арттырудың ең басты құралы және қызметке ынталандырудың бірден-бір кілті ретінде маңызды ақпараттардың ұсынылуы дер едік. Осы орайда Әл-Фараби атындағы Қазақ ұлттық университетінің студенттері «Ынталандыру – жетістік кепілі» атты ұстанымды қолдайды.
Дүниежүзілік Еңбек қорғау күні – бұл тек бір күндік іс-шара емес, ол жұмыс орындарында қауіпсіздік мәдениетін күн сайын дамыту қажеттігін еске салады. Әрбір қызметкердің өмірі мен денсаулығы – ең қымбат құндылық. Қауіпсіз еңбек жағдайын жасау – мемлекет, жұмыс берушілер және жұмысшылардың ортақ жауапкершілігі. Баршамыз «Еңбек қауіпсіздігі – өмір кепілі» деген қағиданы берік ұстанайық!
Айгүл ҚОЖАХАН,
Әл-Фараби атындағы ҚазҰУ-дың қауымдастырылған профессоры,
техника ғылымдарының кандидаты
