Қонаев қаласындағы Бердібек Соқпақбаев атындағы саябақта «Қазақстан халқы Ассамблеясының 30 жылдығына орай «Бірлігіміз – әралуандықта” жобасы аясында республикалық «Тано» корей мәдениеті фестивалі өтті.
Іс-шараны ашқан қала әкімінің орынбасары Төлеген Кенжебеков елімізде 100-ден астам этнос өкілдерінің бірлігі жарасып, тату-тәтті ғұмыр кешіп жатқанын, оларға ана тілін, мәдениеті мен салт-дәстүрін сақтауға мемлекет тарапынан жағдай жасалып отырғанын тілге тиек етті. Облыс орталығында 2005 жылы ЮНЕСКО-ның тізіміне енген ежелгі корей мерекесінің аталып өтіліп жатқаны соның бір көрінісі екеніне баршаның назарын аударды.
Келесі кезекте сөз облыстық қоғамдық келісім және даму орталығының басшысы Елбосын Абайға берілді.
– Бүгінгі фестиваль – өзіндік ерекшелігі мен қоғамдағы орны бар үлкен шара. «Тано» – корей жерінде қадым заманнан тойланып келеді. Ай күнтізбесі бойынша бесінші айдың бесінші күні дегенді білдіретін мерекеде егін егуді аяқтаған ежелгі корейлер Жаратушыдан мол өнім алуды сұрайтын болған. Өткізіліп жатқан шара – Қазақстан мәдениеттерінің алуан түрлілігі шынайы бірліктің, құрмет пен өзара түсіністіктің қалай туатынының символы. Мұндағы достық атмосферада облыс пен Алматы қаласының шығармашылық ұжымдары өнер көрсетуге келіп тұр. Олар ұлттық мәдениеттің байлығын және жан-тәнімен бөлісетін басты шабытты алып жүреді. Қазақстан халқы бейбітшілік пен келісімде өмір сүріп, өзге этностардың салт-дәстүрлерін құрметтеуі керек. Мәдениеттің халықты біріктіруге септігі тиеді. Облыста 105 этнос өкілі тұрады. 34 этномәдени бірлестік тіркелген. Осындай игі істерді этномәдени бірлестіктермен тізе қоса отырып атқарып келеміз, – деген Елбосын Сәкенұлы Қазақстан халқының мәдени дәстүрлерін дәріптеуге үлес қосқан және фестивалді ұйымдастыруға атсалысқан бірқатар азаматтарға Алғыс хат табыс етті. Одан кейін жиналған қауымды мерекемен құттықтаған Алматы корейлері ұлттық орталығының төрағасы Андрей Шин қоғамдық келісім мен тұрақтылық еліміздің басты байлығы екенін баса айтты.
Фестиваль әрі қарай облыстық корей этномәдени орталығы әзірлеген концерттік бағдарламаға жалғасты. «Родина» және «Бидангиль» хоры мен «Бидульги», «Чонсан», «Самульнори», «Укулеле», «Гармония», «НамСон», ансамбльдері өз өнерлерін ортаға салып, көрермендердің қошеметіне бөленді.
Фестивальді қорытындылаған облыстық корей этномәдени орталығының төрағасы Галина Ким өнер көрсеткен ұжым жетекшілері мен іс-шараның жоғары деңгейде өтуіне белсене атсалысқан еріктілерді марапаттады.
Іс-шара шеңберінде дәстүрлі корей ойындары ойнатылып, тағамдары насихатталды. Ойын жеңімпаздарына арнайы сыйлықтар табысталды.
Айжарық КӨПТІЛЕУОВ
