Ұлы Отан соғысының қымбатты ардагерлері!
Құрметті облыс тұрғындары және қонақтар!
Баршаңызды 9 мамыр – Ұлы Отан соғысындағы Жеңіс мерекесімен шын жүректен құттықтаймын!
Бұл соғыста Кеңес одағының халқы үлкен батылдық пен төзімділіктің шынайы үлгісін көрсетті. Бұл соғыстағы Отан қорғаушылардың жасаған ерліктері тарихта мәңгілік қалады. Себебі, ерлік – мәңгі өшпейтін тағылым! Бұл соғыс адамзат тарихындағы ең бір қанқұйлы соғыс болды. Жеңіс жолында миллиондаған адам құрбан болды, жеңісті біз әкелеріміз бен аталарымыздың өмірімен өтедік. Сондықтан да, Жеңісті жақындатуда майданда да, тылда да жанқиярлықпен күреске түскендердің барлығы айрықша құрметке ие, соғыста қаза тапқандардың рухына тағзым етеміз.
Біз әрқашан Жеңіс күнін аға буынның Отанға деген шексіз сүйіспеншілігінің, жастарды ерлік пен патриотизм рухында тәрбиелеудің өлшеусіз өнегесі деп білеміз. Басқыншыларға қарсы тойтарыс беруде Кеңес әскерлерінің құрамында 1 миллион 366 мың қазақстандық болды. Өкініштісі, жыл сайын ардагерлеріміздің қатары сиреп, азая түсуде. Биылғы Жеңіс мерекесін облыс бойынша 5 соғыс ардагері қарсы алуда.
Жеңістің арқасында бiздiң аспанымыз ашық болып, тыныштықта бейбiт өмiр сүрiп, алаңсыз еңбек етiп келемiз. Әкімдік тарапынан ардагерлерді моральдық, әлеуметтік және материалдық тұрғыда көтермелеуге әрқашан қолдау бар. Алматы облысында Жеңістің 80 жылдығына орай 5 ардагерге 5 миллион теңге көлемінде біржолғы әлеуметтік көмек көрсетілді. Сонымен қатар, арнайы акциялар аясында Ұлы Отан соғысының ардагерлері мен тыл еңбеккерлеріне тұрмыстық, медициналық көмектер те ұйымдастырылуда.
Құрметті соғыс және еңбек ардагерлері!
Жеңіс мерекесі – жеңімпаз әкелер мен аға буынның және сол ағалар ісін алға апаратын жас буынның мерекесі. Сіздер қорғаған бейбіт өміріміздің аясында егемен еліміздің мәртебесі жоғары, мерейі үстем болсын! Ұлы мереке құтты болсын!
Құрметпен,
Алматы облысының әкімі
Марат СҰЛТАНҒАЗИЕВ
