Еңбекшіқазақ ауданы Шелек ауылында орналасқан Абай атындағы қазақ орта мектебінің түлектері жылда алтын ұя мектебінде кездесуді дәстүрге айналдырған. Сол дәстүрмен биыл алтыншы жыл қатарынан білім ордасында кездесу ұйымдастырылып, шағын футболдан турнир өтті.
Білім нәрімен сусындатып, тәрбие негізін бойға сіңіріп, үлкен өмірге қанат қақтыратын білім ордасы – мектеп әр адамның жүрегінде ерекше орынға ие. Балалықтың әдемі естеліктері, адал достықтың негізі, пәк сезімнің бастауы да мектеп қабырғасында қаз-қалпында сақталып тұрғандай. Сол бір алаңсыз кездің куәсі болу үшін онда қайта оралып бара бергің келетіні де жасырын емес. Абай атындағы қазақ орта мектебінің түлектері осынау керемет күйдің қадірін жақсы біледі.
Білім ошағынан әр жылдары түлеп ұшқан сыныптас құрбы-құрдастар жиналып, зейнеттегі ұстаздарын ортаға алып, кешегі күннің әсерлі естеліктерімен бөліседі, концерттік бағдарлама, спорттық жарыстар ұйымдастырады. Сонымен қатар түлектердің қаржылай демеушілігімен химия, тарих, ағылшын тілі, орыс тілі, математика, АӘД, бастауыш сынып кабинеттері қажетті құралдармен қамтамасыз етілген. Мектеп музейі, ардагер-ұстаздардың құрметіне ашылған 11 кабинет те түлектер мен ұстаздардың атсалысуымен жабдықталған.
Мұндай кездесулер бүгінде мектеп қабырғасында білім алып жатқан оқушыларға рухани тәрбие беріп, балалардың бойына адамгершілік, үлкенге құрмет, қамқорлық сынды адами асыл қасиеттерді дарытып, аға буын мен жас ұрпақ арасындағы қарым-қатынастың нығая түсуіне себеп болары сөзсіз.
Биылғы кездесуді 1990 жылы бітірген қыз-жігіттер ұйымдастырып, 500-дей түлек қатысты. 1991-1995 және 2000-2010 жылдары мектеп тәмамдағандар мен былтыр ғана студент атанған шәкірттерден 24 команда жиналып, мини футболдан өткен жарыста әдемі ойын көрсетті.
Әрине, бұл турнирде бәрі жеңімпаз болды. Алтын ұя мектебінің абыройын асқақтатып, ортақ мүддеге біркісідей жұмылған Абай атындағы қазақ орта мектебінің кешегі оқушылары – бүгінгі шәкірттерге зор мақтанышпен үлгі тұтар аға буын.
Құралай МҰРАТҚЫЗЫ
Еңбекшіқазақ ауданы
