Екінші дүниежүзілік соғыстың жаһанды жалмаған жалынының елімізде шарпымаған елдімекені, қасірет әкелмеген отбасы жоқ десек, артық айтқандық болмас. Ел басына күн туған шақта қазіргі Қонаев қаласына қарасты Қосқұдық ауылының азаматтары да қолына қару алып қан майданға аттанды. Олардың есімдері ешқашан ұмытылмайды.
Жеңістің 80 жылдығына орай ауыл орталығындағы сұрапыл соғыстан аман-сау оралған майдангерлердің, туған жердің топырағы бұйырмаған боздақтардың және Жеңіс үшін аянбай еңбек еткен тыл ардагерлерінің есімдері қашалып жазылған ескерткіш жанында «Ерлік – елге мұра, ұрпаққа ұран» атты салтанатты жиын өтті. Шараның ашылу рәсімінде еліміздің Мемлекеттік Гимні шырқалып, №9 орта мектептің 11-сынып оқушысы Меруерт Әбішева Тутұғырдағы Қазақстан Республикасының Мемлекеттік Туын жоғары көтерген соң, №9 орта мектеп директоры Гүлмира Елюбаева сөз алып, жиналған қауымды мерекемен құттықтады. Гүлмира Аманбайқызы зұлмат жылдардың жаңғырығы дәуір көшімен ілесіп жүре беретінін, жас ұрпақтың баянды болашағы үшін жанқиярлықпен шайқасқан ата-апалардың есімдері қашан да халық жадында мәңгі сақталатынын, олардың ерлігі ешқашан ұмытылмайтынын тілге тиек етті. Одан кейін сөз Қосқұдық ауылдық ақсақалдар кеңесінің төрағасы, Қонаев қаласының Құрметті азаматы, Білім беру ісінің үздігі Бейсетай Қашақбаевқа берілді.
– Жеңістің рухы ел бірлігінің, татулық пен тұрақтылықтың символы саналады. Бүгінгідей бейбіт заманда ғұмыр кешуімізге себепкер болған майдангерлердің көзін көрдік. Олардың естелігін, ақыл-кеңесін тыңдап өстік. Өзімнің әкем де соғыс ардагері болған. Жас ұрпақ бұл мерекенің тарихи маңызын жете түсініп, бейбітшілікті сақтау жолында жауапкершілік танытуы тиіс. Майдан даласында ерлікпен қаза тапқан боздақтардың, туған жерге аман-сау оралып, ауылдың өсіп-өркендеуіне сүбелі үлес қосқан ардагерлер мен тыл еңбеккерлерінің рухына тағзым ету – бүгінгі ұрпақтың парызы, – деді ақсақалдар алқасының төрағасы.
Келесі кезекте ауылдағы өзін-өзі басқару ұйымының төрағасы Келтай Шаяхметов және аталарының аруағына арналған туған жеріндегі ізгі шараға басқа өңірлерден арнайы келген қонақтар сөз алып, өскелең ұрпақты бейбіт өмірдің қадірін ұғынуға шақырды.
Салтанатты шарадан кейін «Өлі риза болмай, тірі байымас» деген аталы сөзді басшылыққа алған соғыстан қайтқан солдаттар мен мәңгілік алауға айналған боздақтардың және тыл ардагерлерінің бүгінгі ұрпақтары ауыл мешітінің жанындағы қатымханада бас қосып, ата-баба ерлігіне тағзым етіп, аруағына Құран бағыштады.
Дастарқан басында сөз алған ауыл жұртшылығы Отан қорғау жолында арын байрақ, намысын найза етіп жан аямай шайқасқан қосқұдықтықтардың ерен ерліктері жайында сөз қозғады. Сонымен қатар өскелең ұрпаққа үлгі болар игі іс тындыруға мұрындық болған Бейсетай Тәнекеұлының бастамасын ауызбіршілікпен қолдап, сауапты амалға бір кісідей атсалысқан азаматтарға ризашылығын білдірді.
Айжарық Көптілеуов
Қосқұдық ауылы
Қонаев қаласы,
