«Жасы ұлғайған кісіге ең басты нәрсе не?» деген сұраққа, ең алдымен елінің, бала-шағасының амандығы, содан соң денсаулығы деп жауап берер едім. Қазақта «Қай жерің ауырса, жаның сол жерде» деген сөз бар. Оның растығына қариялыққа бет бұрған қазіргі шақта көзіміз әбден жетіп жүр.
Көздің көруі нашарлап, жанар жасаурап жүргеніне біраз уақыт болып еді. Ақпарат құралдарынан Іле ауданы Өтеген батыр ауылындағы Кравцовтың көз емдейтін клиникасы туралы естігенім бар. Содан тәуекел деп Алексей Кравцовтың емін алуға бел будым. Обалы не керек, өзі қарсы алды, тексерілдім, ота жасалатынын айтты.
Қысқасы, Кравцовтың көз емдеу клиникасына екі рет ота жасаттым. Қазір құдайға шүкір, көзім шырақтай. Жарық дүниені анық көруден артық қандай бақыт бар?! Мұндайда айналаңды, жүрер жолыңды, төңірегіндегі адамдарды, табиғат құбылыстарын көруді сыйлаған адамға деген құрметің ерекше болады екен. Олай етпегенде ше? Көзімнің шырағы бірте-бірте сөне бастаған еді, соңғы жылдары көруі тіпіті нашарлады. Осы клиникадан ем алғаннан кейін көздің көруі қалпына келді. Мені емдеген ақ халатты абзал жандарға ризашылығым шексіз. Сондықтан доктор Кравцовтың көз емдеу клиникасының ұжымына, дәрігерлері мен медбикелеріне, жекелей Алексей Сергеевич Кравцовтың өзіне «Алатау арайы» газеті арқылы отбасымның, жеке өзімнің атымнан ризашылығымды білдіруді жөн көрдім. Жарық әлемді қайта сыйлаған ақ халатты абзал жандардың еңбектері жана берсін дегім келеді.
Меделбай ҚАТАЕВ,
Тараз қаласының
Құрметті азаматы
